نئی دہلی: ملک میں دہلی، مہاراشٹرا اور تلنگانہ سمیت 15 ریاستوں میں کوویڈ کے نئے ویریئنٹ ’اومی کرون‘ کے 213 مریض سامنے آنے اور امریکہ میں اس سے ایک شخص کی موت کے بعد حکومت نے ضلعی سطح پراس انفیکشن سے نمٹنے کی تیاری شروع کردی ہے ۔مرکزی حکومت نے اومی کرون کے معاملات میں اضافہ کے مدنظر ضلعی سطح پر نگرانی اور ٹسٹ بڑھانے اور ہاسپٹلس کو کسی بھی صورتحال سے نمٹنے کے لئے تیاررکھنے کے لئے کہا ہے ۔ اس درمیان وزیراعظم نریندرمودی اومی کرون سے نمٹنے کی تیاریوں کے جائزہ کے لئے کل میٹنگ کریں گے ۔ تازہ اعدادوشمار کے مطابق ملک کی 15ریاستوں میں اومی کرون سے متاثرہ213 افراد سامنے آئے ہیں۔ ان میں دہلی میں 57، مہاراشٹرا میں 54، تلنگانہ میں 24، کرناٹک میں 19، راجستھان میں 18، کیرالا میں 15، گجرات میں 14، جموں وکشمیر میں تین، اوڈیشہ میں دو، اترپردیش میں دو اور آندھراپردیش، چندی گڑھ، لداخ، تملناڈو اور مغربی بنگال میں ایک ایک معاملہ سامنے آیا ہے ۔ حکومت کا کہنا ہے کہ ان میں سے کل ملاکر 90افراد کو ہاسپٹلس سے چھٹی دے دی گئی ہے ۔ اس درمیان امریکہ میں ایک شخص کی اومی کرون سے موت کی خبر موصول ہوئی ہے ۔ عالمی صحت تنظیم نے سختی سے کوویڈ قواعد پر عمل کی صلاح دی ہے ۔صحت اور خاندانی فلاح وبہبود کی مرکزی وزارت میں سکریٹری راجیش بھوشن نے کہاکہ اومی کرون کا پھیلاو ڈیلٹا کے مقابلہ میں تین گنا زیادہ متعدی ہوتا ہے ۔ اس لئے اس کا پھیلاو روکنے کے لئے اضافی احتیاط کی ضرورت ہے ۔
