نئی دہلی ۔ 5 اگسٹ ۔ ( ایجنسیز ) اتراکھنڈ کے اترکاشی ضلع کے دھرالی علاقے میں بادل پھٹنے کا اندوہناک واقعہ پیش آیا، جس سے پورے خطے میں تباہی مچ گئی۔ قدرتی آفت کے اس واقعہ میں اب تک کم از کم 4 افراد جاں بحق ہو چکے ہیں، جبکہ 12 افراد کے ملبے میں دبنے کی اطلاعات ہیں۔ انتظامیہ کو اندیشہ ہے کہ تقریباً 60 لوگ تاحال لاپتہ ہیں۔یہ ہولناک واقعہ دھرالی کے کھیرگاڑ علاقے میں پیش آیا، جہاں بادل پھٹنے کے سبب آبی سطح یکایک بڑھ گئی اور سیلاب کا پانی تیزی سے نیچے کی جانب آیا، اپنے ساتھ مٹی، پتھر اور درختوں کا ملبہ لے آیا۔ کئی مکانات، دکانیں اور ہوٹل اس تباہی کی زد میں آ گئے۔سی سی ٹی وی فوٹیج اور مقامی ویڈیوز میں دیکھا جا سکتا ہے کہ صرف چند لمحوں میں پورا علاقہ پانی میں ڈوب گیا، لوگ چیختے پکار رہے تھے اور بے بسی کی تصویر بنے کھڑے تھے۔ ویڈیوز میں پانی کے تیز بہاؤ کے ساتھ مکانات کو بہتے ہوئے بھی دیکھا گیا۔ملبے اور پانی نے دھرالی مارکیٹ کو بُری طرح متاثر کیا ہے۔ کئی ہوٹلوں میں پانی بھر گیا ہے، جبکہ گھروں کے اندر بھی ملبہ داخل ہو گیا ہے۔ مقامی لوگ خوف کے سائے میں رات گزارنے پر مجبور ہیں۔حادثے کی اطلاع ملتے ہی ریسکیو ٹیمیں فوری متحرک ہو گئیں۔ ایس ڈی آر ایف، پولیس، اور فوج کی آفات مینجمنٹ ٹیمیں موقع پر پہنچ چکی ہیں۔ بھٹواڑی سے روانہ کی گئی ایس ڈی آر ایف ٹیم دھرالی میں امدادی کارروائی میں مصروف ہے۔اترکاشی کے ضلع مجسٹریٹ پرشانت آریہ نے میڈیا کو بتایا کہ ہرسل کے قریب دھرالی میں بادل پھٹنے کا بڑا واقعہ پیش آیا ہے۔ ریسکیو ٹیمیں موقع پر کام کر رہی ہیں اور نقصانات کا اندازہ لگایا جا رہا ہے۔اترکاشی پولیس نے سوشل میڈیا پر پیغام جاری کرتے ہوئے عوام سے اپیل کی ہے کہ وہ ندی نالوں سے دور رہیں۔براہ کرم اپنے اہل خانہ، بچوں اور مویشیوں کو ندیوں سے دور رکھیں، کیونکہ صورتحال مزید خراب ہو سکتی ہے۔
صدر مرمو کا اترکاشی میں
جانی و مالی نقصان پر اظہارافسوس
نئی دہلی، 5اگست (یو این آئی) صدر جمہوریہ دروپدی مرمو نے اترکاشی کے دھرالی میں بادل پھٹنے سے آئے سیلاب سے ہونے والے جانی و مالی نقصان پر افسوس کا اظہار کیا ہے اور سوگوار کنبوں کے تئیں تعزیت کا اظہار کیا ہے ۔مرمو نے کہا کہ اترکاشی میں بادل پھٹنے کے واقعہ کی خبر بہت افسوسناک ہے ۔ میں سوگوار کنبوں کے تئیں تعزیت کا اظہار کرتی ہوں اور راحت اور بچاؤ کے کاموں میں کامیابی کی خواہش کرتی ہوں۔منگل کی دوپہر اترکاشی گنگوتری روڈ پر ہرشِل کے قریب دھرالی میں بادل پھٹنے کے واقعہ کے بعد سیلاب آگیا جس کی وجہ سے کئی مکانات، ہوٹلوں اور دکانوں کو نقصان پہنچا۔ اس واقعے میں کئی لوگوں کے ہلاک ہونے کا خدشہ ہے ۔
کھرگے ، راہول اور پرینکا
کا بھی اظہار رنج
نئی دہلی، 5اگست (یو این آئی) کانگریس صدر ملکارجن کھرگے ، پارٹی کے سابق صدر راہول گاندھی اور پارٹی جنرل سکریٹری پرینکا گاندھی واڈرا نے آج اتراکھنڈ میں اترکاشی کے دھرالی میں بادل پھٹنے کے واقعہ پر گہرے غم کا اظہار کیا اور سوگوار کنبوں کے تئیں تعزیت کا اظہار کیا۔کھرگے نے سوشل میڈیا پر ایک پوسٹ میں کہا کہ اتراکھنڈ کے دھرالی (اترکاشی) میں بادل پھٹنے سے ہونے والی تباہی واقعی دل دہلا دینے والی ہے ۔ بہت سے لوگ اپنی جانیں گنوا چکے ہیں اور بہت سے لاپتہ ہیں۔ پورے خاندان تباہ ہو گئے ہیں۔
میں سوگوار کنبوں کے لوگوں کے تئیں تعزیت کا اظہار کرتا ہوں اور حکومت اور انتظامیہ سے اپیل کرتا ہوں کہ وہ امدادی کارروائیوں میں تیزی لائیں’’۔ گاندھی نے کہا، ‘‘دھرالی میں بادل پھٹنے سے ہونے والی زبردست تباہی سے بہت سے لوگوں کی موت اور بہت سے لوگوں کے لاپتہ ہونے کی خبر انتہائی افسوسناک اور تشویشناک ہے ۔ میں متاثرہ کنبوں کے تئیں اپنی دلی تعزیت کا اظہار کرتا ہوں اور امید کرتا ہوں کہ لاپتہ افراد کو جلد سے جلد تلاش کر لیا جائے گا۔ میں انتظامیہ سے اپیل کرتا ہوں کہ راحت اور بچاؤ کے کاموں میں تیزی لائی جائے ۔ کانگریس لیڈروں اورورکروں سے اپیل کرتا ہوں کہ راحت کاموں میں انتظامیہ سے تعاون اور ضرورتمندوں کی ہر ممکن مدد کریں۔’’پرینکا گاندھی واڈرا نے کہا، ‘‘اترکاشی میں بادل پھٹنے کے واقعے میں کچھ لوگوں کی موت اور بڑی تعداد میں لوگوں کے لاپتہ ہونے کی خبر سن کر بہت افسوس ہوا، ایشور مرنے والوں کی آتما کو شانتی دے ، سوگوار کنبوں کے تئیں میری دلی تعزیت!’’