مجلس کے رکن پارلیمنٹ اور دہلی انچارج امتیاز جلیل کا سیاسی پارٹیوں پر وعدہ خلافی کا الزام
نئی دہلی۔ مجلس اتحادالمسلمین نے اُترپردیش کے بعد دہلی میں بھی الیکشن لڑنے کا اعلان کردیا ہے۔ دہلی آمد کے بعد مجلس کے اورنگ آباد رکن پارلیمنٹ اور دہلی انچارج امتیاز جلیل نے باضابطہ پریس کانفرنس کرتے ہوئے سیاسی جماعتوں خاص طور پر عام آدمی پارٹی اور بی جے پی پر سخت تنقید کی ۔ انہوں نے الزام لگایا کہ دہلی کے عوام کو دونوں پارٹیوں نے مایوس کیا ہے جبکہ مسلم اقلیتی آبادی کے ساتھ پارٹیوں نے بے وفائی کی ہے جس کی وجہ سے عوام کی درخواست پر دہلی میں مجلس نے آنے کا فیصلہ کیا ہے۔ امتیاز جلیل نے کہا کہ آنے والے کارپوریشن الیکشن میں مجلس دہلی کے صدر کلیم الحفیظ کی قیادت میں پورے دم خم سے میدان میں اُترے گی اور دہلی کے مایوس عوام کیلئے امید کی کرن بنے گی۔ امتیاز جلیل نے کہا کہ چیف منسٹر اروند کجریوال جن نعروں اور وعدوں کے ساتھ سیاست میں آئے تھے اور عوام نے جن امیدوں کے ساتھ انہیں اقتدار سونپا تھا اس میں وہ ناکام رہے ہیں۔ عوام نے کانگریس کی اقرباء پروری اور مبہم پالیسی اور بی جے پی کی فرقہ وارانہ سیاست سے تنگ آکر عام آدمی پارٹی کی حکومت پر بھروسہ کیا تھا مگر ان کے بھروسہ کو بری طرح ٹھیس پہنچی ہے۔ چیف منسٹر کجریوال نے وعدہ کیا تھا کہ وہ دہلی کو مکمل ریاست کا درجہ دلائیں گے لیکن انہوں نے مزید اختیارات بخوشی گنوادیئے۔ بے روزگاری دور کرنے اور شہریوں کے تحفظ میں بھی عام آدمی پارٹی حکومت نے کوئی کام نہیں کیا ہے۔ انہوں نے کہاکہ اقلیتوں کے ساتھ سوتیلا رویہ بھی موجودہ حکومت کی پالیسی بن گئی ہے۔