19 منٹ میں اپنے نشانہ پر پہنچا، سورج سے متعلق معلومات کی امید
سری ہری کوٹا : ہندوستانی خلائی تحقیقی ادارہ اسرو نے ’پروبا۔3 مشن لانچ کر دیا ہے۔ یہ لانچنگ جمعرات کو شری ہری کوٹا کے ستیش دھون خلائی مرکز سے شام تقریباً 4 بجے ہوئی۔ پروبا۔3 یوروپی خلائی ایجنسی ’ای ایس اے‘ کا سولار مشن ہے، جو سورج کا معمہ حل اور اس سے متعلق معلومات حاصل کرنے کی کوشش کرے گا۔ یعنی سورج سے جڑے راز سے پردہ اٹھانے میں یہ مشن اہم کردار نبھا سکتا ہے۔اس سے قبل اس سیریز کا پہلا سولار مشن 2001 میں اسرو نے ہی لانچ کیا تھا۔ پروبا۔3 مشن کو پی ایس ایل وی۔سی59 راکٹ سے کامیابی کے ساتھ لانچ کیا گیا۔ یہ راکٹ اپنے ساتھ دو سیٹلائٹ کو لے کر گیا ہے جو ایک دوسرے سے تال میل کے ساتھ ہی سورج کے کورونا یعنی شمسی شعاعوں کا مطالعہ کریں گے۔ پہلے یہ مشن 4 دسمبر کو لانچ ہونا تھا لیکن اچانک اسپیس کرافٹ میں آئی تکنیکی خامی کے سبب اسے 24 گھنٹے کیلئے ملتوی کر دیا گیا تھا۔ اسے آج شام 4.12 بجے لانچ کرنے کی تیاری کی گئی تھی لیکن بعد میں اِسرو نے وقت میں تھوڑی تبدیلی کر اسے 8 منٹ پہلے ہی لانچ کر دیا۔پروبا۔3 سورج کی اندرونی فضا کی تصویر لے گا۔ اسرو کے مطابق اب تک یہ تصویر سورج گہن ہونے پر ہی سائنسدانوں کو مل پاتی تھی لیکن اب چیزیں آسان ہو جائیں گی۔ اس کے علاوہ یہ کورونا کا مطالعہ کرے گا۔ یہ سورج کی فضا کا سب سے اوپری حصہ ہوتا ہے جو کئی کلومیٹر تک پھیلا ہوا ہے۔ 2 سالوں پر مشتمل یہ مشن خلائی موسم کی جانکاری بھی دے گا۔پروبا۔3 مشن 1100 کلومیٹر کی دوری طے کر کے اپنے نشانہ پر محض 19 منٹ میں پہنچ گیا۔