احمدآباد،24فروری(سیاست ڈاٹ کام)ہندوستان اور امریکہ کے داعش کے خلاف لڑائی میں مشترکہ عزم کرتے ہوئے امریکہ کے صدر ڈونلڈ ٹرمپ نے آج یہاں اعلان کیا کہ کل نئی دہلی میں ان کا ملک ہندوستان کو تین ارب ڈالر کے ہتھیار فروخت کرنے کے معاہدہ پر دستخط کرے گا۔احمدآباد کے موٹیرا میں واقع دنیا کے سب سے بڑے کرکٹ میدان سردارپٹیل اسٹیڈیم میں دو لاکھ سے زیادہ لوگوں سے خطاب کرتے ہوئے یہ اعلان کیا۔اسٹیج پر ملینیا ٹرمپ اور وزیراعظم نریندرمودی بھی موجود تھے۔ ٹرمپ نے کہا کہ ہم دفاعی تعاون کو مسلسل آگے بڑھاتے رہیں گے،امریکہ ہندوستان کو دنیا کے سب سے زبردست اور بہترین فوجی آلات مہیا کرانا چاہتے ہیں۔ہم ایسے جدید ہتھیار بناتے ہیں جو کوئی نہیں بناتا۔ہندوستان کے ساتھ ان کی خرید کی بات چل رہی ہے۔ انہوں نے کہا کہ مجھے یہ اعلان کرتے ہوئے خوشی ہورہی ہے کہ کل ہمارے نمائندے تین ارب ڈالر سے زیادہ کے فروخت کے معاہدے پر دستخط کریں گے جن میں زیادہ تر فوجی ہیلی کاپٹر اور دیگر فوجی آلات شامل ہیں۔انہوں نے ہندوستان د اور امریکہ کے درمیان تینوں افواج کی مشترکہ فوجی مشق ٹائگر اینڈ ٹرائمف کا ذکر کیا ہے اور کہا کہ دونوں ملک اپنے شہریوں کو انتہا پسند داعش کے خطرے سے بچانے کے لئے متحد ہیں۔انہوں نے کہا،ہندوستان اور امریکہ دہشت گردی کو روکنے اور دہشت کے نظریے سے لڑنے کے لئے ساتھ ساتھ کام کرنے کے لئے پرعزم ہیں۔ انہوں نے کہا کہ ان کی حکومت پاکستان کی زمین پر کام کرنے والی دہشت گرد تنظیموں اور دہشت گردوں کو ختم کرنے کے لئے پاکستانی حکومت کے ساتھ مل کر مثبت طریقے سے کام کررہی ہے۔ان کے انتظامیہ میں اہم امریکی فوج کو خون کے پیاسے آئی ایس آئی ایس کے خلاف پوری طاقت سے لڑنے کی صلاحیت مہیا کرارہے ہیں۔آج کی تاریخ میں آئی ایس آئی ایس کا دبدبہ صد فیصد ختم ہوچکاہے۔
