جیل کے باہر شاہ رخ خاں کے مداحوں کا ہجوم ‘ بیانڈ باجہ سے استقبال
ممبئی: کروز ڈرگس پارٹی کیس میں ملزم بالی ووڈ اداکار شاہ رخ خان کے بیٹے آرین خان کو آج جیل سے بالاخٓرہا کر دیا گیا۔ شاہ رخ خان آرین کو لینے ممبئی کی آرتھر روڈ جیل پہنچے تھے۔ آرین صبح تقریباً 11 بجے آرتھر روڈ جیل سے باہر آئے۔ اس کے بعد وہ والد شاہ رخ خان کے ساتھ گھر روانہ ہوگئے۔آرتھر روڈ جیل کا بیل باکس آج صبح 5.30 بجے کھولا گیا جس کے بعد آرین کے ضمانتی کاغذات جیل کے اندر پہنچ گئے۔ جیل سپرنٹنڈنٹ نتن وائچال نے بتایا کہ آرین کی رہائی کے احکامات موصول ہو گئے ہیں اور رہائی کا عمل جاری ہے۔ ساتھ ہی ساتھ ملزم ارباز مرچنٹ کو آج شام تک رہا کر دیا جائے گا۔ اداکارہ جوہی چاولہ نے جمعہ کو 23 سالہ آرین کے لیے مچلکہ جمع کرایا تاہم رہائی کا آرڈر شام 5.30 بجے تک آرتھر روڈ جیل نہ پہنچ سکا جس کی وجہ سے آرین جیل سے باہر نہ آسکے۔ آرین کی ضمانت جمعرات کو بمبئی ہائی کورٹ نے منظور کر لی تھی لیکن کاغذی کارروائی مکمل نہ ہونے کی وجہ سے انھیں جمعہ تک جیل میں ہی رہنا پڑا۔ عدالت نے اس کیس میں شریک ملز مین منمون دھمیچا اور ارباز مرچنٹ کی ضمانت بھی منظور کر لی ۔آرین کی رہائی کے موقع پر جیل کے باہر شاہ رخ خاں کے مداحوں کا زبردست ہجوم تھا۔ اطلاعات کے مطابق شاہ رخ خاں کے گھر منت تک جلوس کا منظر دکھائی دے رہا تھا جبکہ آرین خاں کا بیانڈ باجہ سے استقبال کیا گیا ۔ یہاں یہ تذکرہ بیجا نہ ہوگا کہ نارکوٹکس کنٹرول بیورو (این سی بی) نے ان تینوں کو 2 اکتوبر کو کروز پر منعقد ہونے والی ڈرگس پارٹی کے دوران حراست میں لیا تھا اور 3 اکتوبر کو باقاعدہ طور پر گرفتار کیا تھا۔