چنائی : ٹا ملناڈو کے وزیر اعلی اور ڈی ایم کے صدر ایم کے اسٹالن نے پارٹی کی زیر قیادت سیکولر پروگریسو الائنس (ایس پی اے) کے رہنماؤں کا انفورسمنٹ ڈائریکٹوریٹ (ای ڈی) کے ذریعہ وزیر وی سینتھل بالاجی کی گرفتاری کے معاملے میں بی جے پی کے انتقامی رویہ کی مخالفت کرنے پر شکریہ ادا کرتے ہوئے کہا کہ پورے ملک میں اپوزیشن کا ایک ساتھ آنا ‘جابر’ بھارتیہ جنتا پارٹی (بی جے پی) کے تابوت میں آخری کیل ثابت ہوگا۔ایس پی اے کے رہنماؤں نے منی لانڈرنگ کیس میں سینتھل بالاجی کی گرفتاری کی مذمت کرتے ہوئے کل کوئمبٹور میں ایک احتجاجی مظاہرہ کیا تھا اور اسے مرکزی تفتیشی ایجنسیوں کا غلط استعمال کرتے ہوئے اپوزیشن کے خلاف بی جے پی کے ذریعہ شروع کیا گیا سیاسی انتقام قرار دیا۔ اسٹالن نے یہاں ایک بیان میں کہا کہ بی جے پی کو احساس ہو گیا ہے کہ شکست اس کے سامنے ہے۔انہوں نے کہا کہ بی جے پی اپنی ناکامیوں کو چھپانے کے لیے سیاسی طور پر مخالفین سے لڑنے کے بجائے، بزدلی اور تکبر کا سہارا لے رہی ہے۔واضح رہے 23 جون کو اپوزیشن کی زیادہ تر سیاسی جما عتیں بہار میں جمع ہو رہی ہیں اور اس اجلاس کو اپوزیشن کی 2024 کے عام انتخابات کے لئے تیاری کہا جا رہا ہے۔ حزب اختلاف کے اس اجلاس سے حکمراں جماعت بھی فکر مند نظر آ رہی ہے۔
