بی سی تحفظات میں بی آر ایس اور بی جے پی اہم رکاوٹ، پونم پربھاکر اور کونڈہ سریکھا کی پریس کانفرنس
حیدرآباد 27 نومبر (سیاست نیوز) وزیر ٹرانسپورٹ پونم پربھاکر نے کہاکہ مجالس مقامی اداروں میں پسماندہ طبقات کو 42 فیصد تحفظات کی فراہمی میں کانگریس حکومت سنجیدہ ہے۔ گاندھی بھون میں وزیر جنگلات کونڈہ سریکھا کے ہمراہ میڈیا سے بات چیت کرتے ہوئے پونم پربھاکر نے کہاکہ بی سی تحفظات کے مسئلہ پر اپوزیشن عوام کو مشتعل کرنے کی کوشش کررہا ہے۔ کانگریس پر بی سی طبقات کے ساتھ دھوکہ دہی کا الزام بے بنیاد ہے۔ حکومت نے مکمل سنجیدگی کا مظاہرہ کرتے ہوئے اسمبلی میں بلز کو منظوری دی لیکن صدرجمہوریہ کے پاس زیرالتواء ہیں۔ اُنھوں نے کہاکہ آرڈیننس کی اجرائی کی راہ میں قانونی رکاوٹ پیدا کی گئی ہے۔ تحفظات کو قطعیت دینے تک پنچایت راج اداروں کے چناؤ کو مکمل کرنے کا فیصلہ کیا گیا جس میں کانگریس پارٹی ٹکٹوں کی تقسیم میں پسماندہ طبقات کو 42 فیصد نمائندگی دے گی۔ وزراء نے بی سی طبقات سے اپیل کی کہ وہ بی آر ایس اور بی جے پی کے گمراہ کن پروپگنڈہ کا شکار نہ ہوں۔ ہائیکورٹ سے تحفظات پر عمل آوری کی اجازت حاصل کرنے کی کوشش کی جارہی ہے۔ اُنھوں نے کہاکہ اپوزیشن نے ہائیکورٹ سے رجوع ہوکر تحفظات پر راحت حاصل کرنے کی کوئی کوشش نہیں کی ہے۔ مرکزی حکومت سے پنچایت راج اداروں کی 2800 کروڑ کی اجرائی باقی ہے جس کے لئے بی جے پی قائدین مرکز سے نمائندگی سے قاصر ہیں۔ اُنھوں نے کہاکہ تحفظات کی راہ میں دونوں پارٹیاں رکاوٹ پیدا کررہی ہیں تاکہ حکومت کے امیج کو متاثر کیا جائے۔ اُنھوں نے کہاکہ معاشی طور پر پسماندہ طبقات کے لئے بی جے پی حکومت نے تحفظات فراہم کئے لیکن بی سی تحفظات میں اضافہ کے لئے تیار نہیں ہے۔ دستوری ترمیم کے ذریعہ 42 فیصد تحفظات کو یقینی بنایا جاسکتا ہے۔ اُنھوں نے بی جے پی اور بی آر ایس قائدین سے مطالبہ کیاکہ مرکزی حکومت پر دباؤ بنائیں تاکہ تحفظات بلز کو منظوری حاصل ہو۔1
