لکھنؤ: محکمہ انکم ٹیکس نے ہفتہ کی صبح سماج وادی پارٹی کے صدر اکھلیش یادو اور اُن کی اہلیہ ڈمپل یادو کے قریبی ایس پی قائدین کے لکھنؤ،مئو اور آگرہ میں واقع رہائش گاہوں اور دفاتر پر دھاوے کئے ۔ ایس پی نے اسے’سیاسی چھاپے‘قرار دیا ہے ۔یہ چھاپے ایس پی کے قومی ترجمان و سکریٹری راجیو رائے کے مئو میں واقع ان کے رہائش گاہ دفتر، لکھنؤ میں جنیندر یادو کی گومتی نگر کی رہائش گاہ اور آگرہ میں منوج یادو کے گھر پر انکم ٹیکس کے افسران نے بھاری پولیس سیکورٹی کیساتھ چھاپے مارے۔ راجیو رائے کے گھر اور رہائش گاہ پر وارانسی کی ایک ٹیم نے چھاپہ مارا ۔ اس کی اطلاع ملتے ہی بڑی تعداد میں ایس پی کے لیڈر اور کارکنان راجیو رائے کی رہائش گاہ پر جمع ہوگئے ۔ اس کارروائی پر راجیو رائے نے کہا کہ نہ تو میرا کوئی مجرمانہ ریکارڈ ہے اور نہ ہی میرے پاس کوئی دو نمبر کا پیسہ ہے ۔بی جے پی اقتدار میں مفاد عامہ کے کام کرنا بھی اب جرم ہوگیا ہے ۔ ایس پی کے ترجمان اعلیٰ راجندر چودھری نے کہا چونکہ اسمبلی انتخابات نزدیک آرہے ہیں یہ سیاسی چھاپے ماری ہے۔ ادھر ایس پی سربراہ اکھلیش یادو نے رائے بریلی میں میڈیا نمائندوں سے بات کرتے ہوئے کہاکہ بی جے پی کو ہار ستائے گی تو دہلی سے بڑے بڑے لیڈر آئیں گے ۔
ابھی انکم ٹیکس آیا ہے پھر ای ڈی آئے گا۔ انہو ں نے کہا کہ راجیو ہماری پارٹی کے ترجمان ہیں ۔ آج ان کے یہاں بھی چھاپہ مارا گیا ہے ۔ الیکشن سے ٹھیک پہلے ان کے یہاں چھاپے ماری کی گئی ہے ۔ یہ کاروائی ایک ماہ پہلے بھی کرسکتے تھے ۔ اب انکم ٹیکس بھی اترپردیش میں الیکشن لڑنے آگیا ہے ۔بی جے پی کے پاس کوئی نیا راستہ نہیں ہے ۔