نئی دہلی۔11 ڈسمبر (سیاست ڈاٹ کام) بہترین فارم میں موجود مینک اگروال کو زخمی شکھر دھون کی جگہ ویسٹ انڈیز کے خلاف ونڈے سیریز کے لئے ہندوستانی کرکٹ ٹیم میں شامل کیا گیا ہے ۔آل انڈیا سینئر سلیکشن کمیٹی نے مینک کو زخمی شکھر کی جگہ ونڈے ٹیم میں شامل کیا ہے ۔ دھون کوگھریلو ٹی20 ٹورنمنٹ سید مشتاق علی ٹرافی کے دوران دہلی کی جانب سے مہاراشٹر کے خلاف کھیلتے ہوئے بائیں گھٹنے میں گہرا زخم تھا۔ اسی وجہ سے دھون ویسٹ انڈیز کے خلاف ٹوئنٹی 20 سیریز سے بھی باہر ہیں جس میں سنجو سیمسن کو ان کی جگہ شامل کیاگیا تھا۔ بی سی سی آئی کی میڈیکل ٹیم کے مطابق دھون کے گھٹنے میں لگے ٹانکے کاٹ دیئے گئے ہیں لیکن ان کی زخم بھرنے میں ابھی وقت لگے گا اور انہیں میچ کے لیے مکمل طور پر تیار ہونے کے لئے بالکل فٹ ہونے کی ضرورت ہے جس میں ابھی مزید وقت لگ سکتا ہے ۔ اگرچہ بورڈ نے جاری کی گئی اطلاعات میں یہ نہیں بتایا کہ دھون کب تک واپس آ جائیں گے ۔ہندوستان اور ویسٹ انڈیز کے درمیان تین ون ڈے میچوں کی سیریز کھیلی جانی ہیں جس کا پہلا میچ چنئی میں 15 دسمبر، دوسرا میچ 18 دسمبر کو وشاکھاپٹنم اور تیسرا میچ کٹک میں 22 دسمبر کو کھیلا جائے گا۔مینک فی الحال ڈنڈیگل میں رانجی ٹرافی کے پہلے راؤنڈ میں کرناٹک کے لئے تمل ناڈو کے خلاف کھیل رہے ہیں۔ ان کے قومی ٹیم میں شامل کئے جانے سے اب وہ17 دسمبر سے شروع ہو رہے رانجی میچ کے دوسرے راؤنڈ میں حصہ نہیں لے سکیں گے ۔ یہ اس سال مسلسل دوسرا موقع ہے جب مینک کو ونڈے ٹیم میں کسی کھلاڑی کی جگہ شامل کیا گیا ہے ۔اس سے پہلے انہیں آل راؤنڈر وجے شنکر کی جگہ ورلڈکپ میں جگہ ملی تھی جن کے انگوٹھے میں چوٹ لگ گئی تھی۔
