نئی دہلی: ملک میں کورونا کیسز میں کمی آنے کے ساتھ ہی بہت سی ریاستوں نے اسکول کھول دیے ہیں۔ ان ریاستوں میں پنجاب ، بہار ، مدھیہ پردیش ، جھارکھنڈ ، مہاراشٹر ، چھتیس گڑھ اور اتراکھنڈ وغیرہ شامل ہیں۔ دہلی حکومت نے بھی کورونا وبا کے پھیلنے کے بعد سے بند پڑے اسکولوں کو بھی کل سے کھول دیا ہے۔ اس فیصلے کے تحت نویں سے بارہویں تک کی کلاسیں شروع کی جا رہی ہیں۔ دہلی کے نائب وزیر اعلیٰ اور وزیر تعلیم منیش سیسوڈیا نے کہا ، ‘اگر ہم نے ابھی اسکول نہیں کھولے تو ایک پوری نسل علم کے فرق کے ساتھ آگے بڑھے گی۔ جب ہم نے عوام سے تجاویز طلب کیں تو 70٪ لوگ سختی سے چاہتے تھے کہ اسکول کسی بھی قیمت پر کھولے جائیں۔
