حیدرآباد ،23 نومبر (یو این آئی) تلنگانہ کے وزیر جنگلات و ماحولیات اندرا کرن ریڈی نے واضح کیا ہے کہ ریاست میں تمام اہل افراد کو حکومت کی جانب سے ڈبل بیڈروم مکانات تعمیر کرتے ہوئے فراہم کئے جائیں گے ۔انہوں نے ضلع نرمل کے بھینسہ ٹاون کی کملاپورگیٹ کے قریب ڈبل بیڈ روم مکانات کی تعمیر کے لئے سنگ بنیاد رکھا۔اس موقع پر وزیر موصوف نے کہا کہ وزیراعلی کے چندرشیکھرراو کی زیرقیادت ٹی آرایس حکومت انسانی بنیادوں پر سونچ رکھتی ہے ،غریبوں کی عزت نفس کے تحفظ کے مقصد سے ان کے لئے ڈبل بیڈ روم مکانات تعمیر کئے جارہے ہیں۔ان مکانات میں تمام طرح کی سہولیات موجود ہیں۔ہر مکان کی تعمیر پر 5.30لاکھ روپئے کا صرفہ ہورہا ہے ۔انہوں نے واضح کیا کہ ریاست میں کسانوں کے لئے رعیتو بیمہ، رعیتو بندھو اسکیم کی شروعات کی گئی ہے ،ساتھ ہی کالیشورم پروجیکٹ کی بھی تعمیر عمل میں لائی گئی ہے ۔تلنگانہ کو ریاست کا درجہ دیئے جانے کے بعد کسانوں کے لئے کئی فلاحی اسکیمات کا آغاز کیاگیا ہے ۔فصل کی خریداری کے مراکز کے ذریعہ کسانوں سے ان کی پیداوار کو اقل ترین امدادی قیمت میں خریدنے کے لئے بھی اقدامات کئے جارہے ہیں۔
