تہران : لبنان اور شام ایرانی حمایت یافتہ عسکری گروپوں کو درپیش غیر معمولی صورت حال کے درمیان ایرانی وزیر خارجہ حسین امیر عبداللہیان دونوں ملکوں کے دورے پر ہیں ۔ وزیر خارجہ حسین امیر عبداللہیان جمعہ کو لبنان پہنچے۔ دوسری جانب شام کے صدر بشارالاسد کے حامی اخبار الوطن نے خبر دی ہے کہ ایران کے وزیر خارجہ اگلے ہفتہ کے شروع میں شام کا دورہ کرنے آرہے ہیں۔’الوطن’ کے مطابق وزیر خارجہ حسین امیر عبداللہیان شام کے اندر ہونے والے تازہ اسرائیلی و امریکی حملوں کے علاوہ غزہ میں جاری جنگ کی صورت حال پر شام کی قیادت کے ساتھ تبادلہ خیال کریں گے۔ یہ بھی امکان ہے کہ وہ قطر کے دورے پر بھی جائیں گے۔
ذرائع نے روئٹرز کو بتایا ہے پچھلے ہفتہ ایرانی پاسداران انقلاب نے اپنے افسران کو شام سے واپس بلا لیا ہے۔ پاسداران انقلاب نے اپنے ان افسران کو شام میں اسرائیلی حملوں کے بعد واپس بلایا ہے۔ تاہم شام میں ایران کے سفیر حسین اکبری کا کہنا ہے کہ ایران شام میں موجود ہے۔
