ریاض۔ 11مارچ ۔(سیاست ڈاٹ کام) سعودی عرب نے الزام عاید کیا کہ ایران کرونا وائرس کے پھیلائو کی روک تھام کیلئے کی جانے والی عالمی کوششوں کو نقصان پہنچا رہا ہے۔ ’العربیہ‘ کے مطابق خادم الحرمین الشریفین شاہ سلمان بن عبدالعزیز آل سعود کی زیرصدارت کابینہ کے اجلاس میں ایران کی جانب سے سعودی شہریوں کے پاسپورٹس پر مہر لگائے بغیرانہیں ایران جانے کی اجازت دینے کے اقدام کو غیرذمہ دارانہ قرار دیتے ہوئے اس کی شدید الفاظ میں مذمت کی ہے۔اجلاس میں کہا گیا ہیکہ ایک ایسے وقت میں جب پوری دنیا کرونا وائرس کے خطرات سے دوچار ہے ایران اس وباء کی روک تھام میں مدد کے بجائے اس کے مزیدپھیلائو کی کوشش کررہاہے۔ سعودی عرب کے شہریوں کو ضابطے کی کارروائی کے بغیر ایران آنے جانے کی اجازت دے کرایران نے کرونا کے پھیلائو کی کوشش کی ہے تاکہ یہ وبا سعودی عرب میں پھیل جائے۔ اجلاس میں کرونا وائرس کی روک تھام کیلئے حکومت کی طرف سے عوام کیلئے کیے گئے حفاظتی اقدامات، کرونا کے انسداد کیلئے عالمی مساعی پرغور کیا گیا۔ بیرون ملک سے آنے والے نصف ملین افراد کی اسکریننگ کی گئی۔