تہران: ایرانی وزیر خارجہ سید عباس عراقچی اور ان کے ترک ہم منصب ہاکان فیدان نے غزہ اور لبنان کے خلاف نئے اسرائیل کے نئے حملوں کو روکنے کیلئے مسلم ممالک سے مزید کوششیں کرنے کا مطالبہ کیا۔ایرانی وزارت خارجہ کی طرف سے جاری کردہ ایک بیان کے مطابق، پیر کو ایک فون کال میں، دونوں فریقوں نے مغربی ایشیا کے خطے کی تازہ ترین پیش رفت، خاص طور پر فلسطین کی صورتحال، غزہ اور لبنان پر اسرائیلی حملوں کی بحالی، یمن پر امریکی فضائی حملوں کے ساتھ ساتھ مشترکہ دلچسپی کے دیگر بین الاقوامی امور پر تبادلہ خیال کیا۔ حماس اور حزب اللہ کے ساتھ جنگ بندی کے معاہدوں کی خلاف ورزی کرتے ہوئے غزہ اور لبنان کے خلاف اسرائیل کے ’’جرائم اور جارحیت ‘‘ کی مذمت کی اور عالمی برادری بالخصوص مسلم اور علاقائی ممالک سے مطالبہ کیا کہ وہ اسرائیل کے ’’جرائم‘‘ کو روکنے کیلئے فوری اقدام کریں۔ عراقچی نے یمن کے خلاف امریکی فضائی حملوں کی بھی مذمت کی، اور مسلم ریاستوں کے خلاف جارحیت اور مغربی ایشیا کے خطے میں عدم تحفظ اور عدم استحکام میں اضافے کو روکنے کیلئے علاقائی ممالک کے درمیان مزید تعاون اور ہم آہنگی کی اہمیت پر زور دیا۔فیدان نے علاقائی اور بین الاقوامی مسائل کے سفارتی حل تلاش کرنے کیلئے اپنے ملک کی تیاری کا اظہار کیا۔
