تہران : ایران اور مغربی ممالک کے درمیان ایٹمی پروگرام پر مذاکرات کا سلسلہ 29 نومبر سے بحال ہو گا۔ایران کے نائب وزیر خارجہ علی باقری اور یورپی یونین قائد اینریکی مورا نے ٹیلی فون پر بات چیت کی جس کے بعد علی باقری نے مذاکرات کا سلسلہ بحال ہونے کا اعلان کیا۔علی باقری کا کہنا تھا کہ ان مذاکرات میں ایران پر عائد غیر قانونی اور غیر انسانی پابندیاں اٹھانے پر بات چیت ہو گی۔یاد رہے کہ سابق امریکی صدر ڈونالڈ ٹرمپ نے مئی 2018 میں جے سی پی او اے سمجھوتہ سے امریکہ کو الگ کرکے ایران پر پابندیاں لگا دی تھیں۔تاہم جوبائیڈن نے انتخابی مہم کے دوران ہی اعلا ن کیا تھا کہ وہ منتخب ہوئے تو امریکا کو اس اہم معاہدہ کا دوبارہ حصہ بنایا جائے گا۔
