واشنگٹن ۔ 3 جنوری (سیاست ڈاٹ کام) امریکہ کی ری پبلیکن پارٹی کے سینیٹر لنزے گراہم نے آج جمعہ کے روز امریکی فوج کے فضائی حملے میں ایرانی قدس بریگیڈ کے سربراہ قاسم سلیمانی کی ہلاکت کو ایرانی حکومت پر کاری ضرب قرار دیا ہے۔ ان کا کہنا ہے کہ قاسم سلیمانی کی ہلاکت ایران کے لیے بہت بڑا دھچکا ہے، اگر ایران باز نہ آیا تو اسے مزید سبق سکھائیں گے۔ٹویٹر پر پوسٹ کردہ ایک ٹویٹ میں لنز ے گراہم کا کہنا تھا کہ قاسم سلیمانی کی ہلاکت کے بعد ایران کو پتا چلا کہ امریکیوں کو ہلاک اور زخمی کرنے اور ان کا خون بہانے کی کیا قیمت چکانا پڑتی ہے۔امریکیوں پرحملے بہت مہنگے پڑتے ہیں۔ سلیمانی آیت اللہ کی حکومت کے انتہائی بے رحم اور شیطانی عناصر میں سے ایک تھا۔اس کے ہاتھ امریکیوں کے خون رنگے ہوئے تھے۔گراہم نے “ٹویٹر” ٹویٹ میں مزید کہا ہے کہ امریکیوں کو زخمی کرنے اور ہلاک کرنے کی قیمت بہت مہنگی ہے۔ انہوں نے ایرانی ملیشیائوں کے خلاف صدر ٹرمپ کی جارحانہ پالیسی کو سراہا۔