عالمی برادری کا انتظار نہیں کیا جائیگا، نیوکلیئر ٹھکانوں پر حملوں کے منصوبہ کی تجدید
یروشلم: اسرائیلی وزیر دفاع بینی گینٹز نے دھمکی دی ہے کہ عالمی برادری کا انتظار کئے بغیر ایران کے نیوکلیئر ہتھیاروں کے بڑھتے ہوئے خطرے سے خود نمٹ لیں گے۔غیر ملکی میڈیا رپورٹس کے مطابق اسرائیلی وزیر دفاع نے کہا کہ ایران نے دنیا سے کئے ہوئے اپنے تمام وعدے توڑ دیئے ہیں،عالمی برادری کے ساتھ کئے ہوئے تمام معاہدوں پر ایران نے کبھی بھی عمل نہیں۔اسرائیلی وزیر دفاع نے کہنا تھا کہ امریکہ اور عالمی برادری نے ایران کے ساتھ 2015 میں جو نیوکلیئر معاہدہ کیا تھا، اس میں اسرائیل اور مشرق وسطیٰ کے دیگر ممالک کو شامل نہیں کیا تھا۔بینی گینٹز نے امریکہ پر زور دیتے ہوئے کہا کہ ایران کو جوہری ہتھیاروں کی تیاری سے باز رکھنا ہو گا، اگر امریکہ اور عالمی برادری ایران کو نیوکلیئر ہتھیاروں کی تیاری سے نہ روک پائی تو اسرائیل کے پاس اس کے سوا کوئی دوسرا چارہ نہیں ہو گا کہ اپنی اور خطے میں اپنے اتحادیوں کی حفاظت کے لئے از خود سے کارروائی کریں۔اسرائیلی وزیر دفاع کا کہنا تھا کہ ہمیں اپنی حفاظت خود کرنی آتی ہے اور اس کے لئے واشنگٹن کو شامل کئے بغیر خود سے کوئی بھی اقدام کر سکتے ہیں، اسرائیل حملہ کرنے اور اپنے دفاع کی صلاحیتوں کو بہتر بنانے کے لئے تیزی سے کام کر رہا ہے۔ اسرائیلی وزیر دفاع بینی گینٹز نے باور کرایا ہے کہ اسرائیلی فوج ایران کے جوہری ٹھکانوں کو نشانہ بنانے کے منصوبے کی تجدید کر رہی ہے اور فوج خود مختار صورت میں کام کرنے کے لیے تیار ہے۔ اسرائیلی وزیر دفاع کے مطابق ان کے ملک نے ایران کے اندر کئی اہداف کا تعین کر لیا ہے جن کو نشانہ بنانے کا مقصد جوہری بم کی تیاری کے حوالے سے تہران کی صلاحیت کو نقصان پہنچانا ہے۔گینٹز کا مزید کہنا تھا کہ اگر دنیا انہیں (ایرانیوں کو) جوہری ہتھیار حاصل کرنے سے روک لیتی ہے ،تو یہ بہت اچھا اقدام ہو گا، تاہم اگر ایسا نہ ہوا تو پھر ہمیں خود مختار صورت میں کھڑا ہونا چاہیے اور ہم خود سے اپنا دفاع کریں گے۔