جنوبی کیرولینا منتقل
دوحہ ۔ 30 ستمبر (سیاست ڈاٹ کام) امریکہ نے قطر میں قائم اپنا ایک بڑا فوجی اڈہ ایران کے ساتھ جاری کشیدگی اور ممکنہ فوجی محاذ آرائی کے پیش نظر دوحہ سے جنوبی کیرولینا منتقل کردیا ہے۔اخبار واشنگٹن پوسٹ کے مطابق ایران کے ساتھ جاری تناؤ اور خطے میں ممکنہ تنازع کے نتیجے میں امریکہ نے قطر میں قائم فوجی العْدید ایئربیس پرموجود سامان 7000 کلو میٹر دور جنوبی کیرولینا منتقل کردیا ہے۔ العدید فوجی اڈا پچھلے 13 سال سے مشرق وسطیٰ میں امریکہ کا ایک بڑا فوجی مرکز تھا جہاں پرموجود لڑاکا جیٹ ، بمبار طیارے ، ڈرون اور امریکی فضائیہ کے دیگر بھاری ہتھیار شمال مشرقی افریقہ سے مشرق وسطیٰ اور جنوبی ایشیا تک آپریشنز میں استعمال کیے جاتے رہے ہیں۔رپورٹ کے مطابق ہفتے کے روز تک امریکی فضائیہ کے 300 طیارے شام ، افغانستان اور خلیج جیسے کلیدی علاقوں میں پرواز کر رہے تھے لیکن قطر کے ‘العدید’ سے جنگی آلات اور طیارے ساؤتھ کیرولینا منتقل کرنے کے بعد اس ایئربیس پرمشترکہ فضائی آپریشن کمانڈ سینٹر کی سیکڑوں نشستیں خالی ہوگئی ہیں۔