تمام کی کورونا وائرس جانچ، باقی ہندوستانیوں کو لانے کی کوشش
نئی دہلی10 مارچ (سیاست ڈاٹ کام ) ایران میں پھنسے 58 ہندوستانی شہریوں کے پہلے جتھے کو لے کر ہندوستانی فضائیہ کا طیارہ سی -17 گلوب ماسٹر منگل کی صبح غازی آباد کے ہنڈن ایئر فورس اسٹیشن پہنچا جس میں 31 خواتین، 25 مرد اور دو بچے شامل ہیں۔ان سبھی ہندوستانیوں کی کورونا وائرس جانچ کرائی گئی۔ ہندوستانیوں کی واپسی کے ساتھ ہی ایران سے 529 نمونے جانچ کے لئے بھی لائے گئے ہیں۔ایران میں کورونا وائرس کے اثر میں اضافہ ہورہا ہے اور وہاں 243 لوگوں کی موت ہو چکی ہیں۔ ایران میں تقریباً 2000 ہندوستانی شہری ہیں۔ایران سے وطن لائے گئے سبھی شہری مذہبی دورے پر گئے تھے اور وہاں کورونا وائرس کے پھیلنے پر انہوں نے حکومت سے واپس بلانے کی فریاد کی تھی۔وزیر خارجہ ایس جے شنکر پرساد نے ایران میں واقع ہندوستانی سفارت خانے کے حکام اور وہاں موجود ہندوستانی طبی ٹیم کا مشکل حالات میں کام کرنے کے لئے شکریہ ادا کیا ہے ۔ڈاکٹر پرساد نے پہلے جتھے کی آمد کی ٹویٹ کے ذریعہ اطلاع دی۔ انہوں نے کہا تہران سے ہندوستانی عقیدت مندوں کو لے کر پہلا جتھا وطن آ گیا ہے ۔ وزیر خارجہ نے ایران کے حکام کا تعاون کے لئے شکریہ کرتے ہوئے کہا کہ وہاں پھنسے ہوئے باقی ہندوستانیوں کو نکالنے کی سمت میں بھی قدم اٹھائے جا رہے ہیں۔مسٹر پرساد نے پیر کو سری نگر میں جموں کشمیر کے لوگوں سے ملاقات کی جن کے بچے بڑی تعداد میں ایران میں تعلیم حاصل کرنے کے لئے گئے ہوئے ہیں۔ انہوں نے یقین دہانی کرائی تھی کہ حکومت تہران سے جلد ہی انہیں وطن لے آئے گی۔ذرائع کے مطابق انہیں ہندوستان لاکر کورونا وائرس کے متاثریں کے لئے بنائے گئے خصوصی مراکز میں رکھا جائے گا۔