تہران ۔ ایران نے ایک دن میں کورونا وائرس سے سب سے زیادہ 251 افراد کے ہلاک ہونے کی تصدیق کی ہے۔ چار دن قبل بھی ایران میں ایک دن میں 239 افراد کورونا سے ہلاک ہوئے تھے۔ مقامی میڈیا کے حوالے سے کہا گیا ہیکہ ایران کے دو سینئر عہدیدار وائرس سے متاثر ہوگئے ہیں۔ ان میں اٹامک انرجی آرگنائزیشن کے سربراہ بھی شامل ہیں۔ ایران کی نیم سرکاری خبر رساں ایجنسی تسنیم کے بموجب کہ اٹامک انرجی آرگنائزیشن کے سربراہ علی اکبر صالح جو ملک کے نائب صدر بھی ہیں پچھلے ہفتے ان کا کورونا ٹسٹ مثبت آیا تھا اور وہ تب سے گھر میں ہی قرنطینہ میں ہیں تاہم ان کی صحت اچھی ہے۔ ایران کے نائب صدر برائے بجٹ اور منصوبہ بندی کے انچارج محمد باقر نوبخت کا کورونا ٹسٹ بھی مثبت آیا ہے۔ وزارت صحت کی ترجمان سیما لاری نے کہا ہیکہ ملک میں کورونا سے مرنے والوں کی تعداد بڑھ کر28 ہزار 544 ہوگئی ہے جسکی وجہ سے ایران خطے کا سب سے متاثرہ ملک بن چکا ہے۔ایران میں گذشتہ 24گھنٹوں کے دوران مزید 3 ہزار 822 نئے کیسوں کی تصدیق ہوئی ہے۔ اس طرح ملک میں متاثرین کی تعداد بڑھ کر 5 لاکھ 75 ہوگئی۔
