تہران : ایران کے شمال مشرقی شہر مشہد میں شدید بارش سے سیلابی صورتحال پیدا ہوگئی، جس کے سبب 7 افراد جاں بحق ہوگئے۔ ایران کی سرکاری خبر رساں ایجنسی ارنا کی رپورٹ کے مطابق چہارشنبہ کے روز صوبہ خراسان رضوی کے مشہد کے انقلاب چوک پر ایک کار میں پھنسے 2 افراد سیلابی پانی میں ڈوب کر زندگی کی بازی ہار گئے۔ صوبائی محکمہ موسمیات کا کہنا ہے کہ صوبہ خراسان رضوی میں منگل سے موسلادھار بارش شروع ہو گئی ہیں اور بارش کا یہ سلسلہ آئندہ کئی روز تک جاری رہ سکتا ہے۔ رپورٹس کے مطابق انقلاب چوک پر امدادی کشتیاں تعینات کر دی گئی ہیں، جبکہ ریسکیو ٹیمیں ممکنہ زندہ بچ جانے والوں کی تنعش میں مصروف عمل ہیں۔ اس کے علاوہ ایک رہائشی عمارت گرنے سے ایک خاتون اور اس کے 4 بچے لقمہ اجل بن گئے، کم از کم 250 خاندانوں کو شہر اور قریبی گاؤں میں محفوظ مقامات پر پناہ دی گئی ہے۔
