تہران۔ 29فبروری ۔(سیاست ڈاٹ کام) ایرانی میڈیا کے مطابق بندر عباس شہر کے نواحی قصبے توحید میں بعض افراد نے ایک ڈسپنسری میں آگ لگا دی۔سوشل میڈیا پر زیر گردش رپورٹوں میں بتایا گیا ہے کہ حملہ آوروں کا خیال تھا کہ قُم شہر سے لائے گئے کورونا وائرس کے 10 مریض اس ڈسپنسری میں زیر علاج ہیں۔ واضح رہے کہ قُم شہر ایران میں کورونا وائرس کے پھیلاؤ کا گڑھ ہے۔فارس نیوز ایجنسی کے مطابق بندر عباس کی ڈسپنسری میں کورونا کے متاثرہ مریضوں کی موجودگی کے حوالے سے بے بنیاد افواہوں نے لوگوں کو چراغ پا کر دیا اور توحید قصبے میں بعض افراد نے اس ڈسپنسری کو آگ لگا دی۔ پولیس اور فائر بریگیڈ کے اہلکار فوری طور پر جائے حادثہ پر پہنچ گئے۔ انہوں نے لوگوں سے پر سکون رہنے کا مطالبہ کیا اور ڈسپنسری میں لگی آگ کو بجھایا۔ہرمزجان یونیورسٹی فار میڈیکل سائنسز میں تعلقات عامہ کی سربراہ فاطمہ نوروزیان کے مطابق بندر عباس شہر میں شہید محمدی ہاسپٹل کے اندر کورونا سے متاثرہ افراد کیلئے ایک خصوصی ونگ موجود ہے لہذا ڈسپنسریوں میں کورونا کے مریضوں کی موجودگی کے حوالے سے افواہیں محض جھوٹ ہے۔