واشنگٹن ۔ 5 ستمبر (سیاست ڈاٹ کام) امریکی صدر ڈونالڈ ٹرمپ نے باور کرایا ہیکہ ایران کو اقتصادی طور پر کْچلا جا رہا ہے اور وہ اپنے مسائل کے حل کیلئے کوشاں ہے انہوں نے انکشاف کیا کہ ایران مذاکرات کرنے اور ایک معاہدہ کا خواہاں ہے۔امریکی صدر نے زور دیکر کہا کہ ایران پر عائد پابندیاں اٹھائی نہیں جائیں گی۔ انہوں نے مزید کہا کہ گذشتہ سال ایران نے اپنے آخری پچاس برسوں کا بدترین وقت گزارا۔چہارشنبہ کو وائٹ ہاؤس میں صحافیوں کے سوالات کے دوران ٹرمپ سے پوچھا گیا کہ کیا انکی اقوام متحدہ میں جنرل اسمبلی کے سالانہ اجلاس کے موقع پرایرانی لیڈر سے ملاقات ہو سکتی ہے؟ اس کے جواب میں صدر ٹرمپ نے کہا کہ ’’یقیناً، کچھ بھی ممکن ہے … وہ اپنی مشکلات کا حل چاہتے ہیں … ہم انہیں 24 گھنٹوں کے اندر حل کر سکتے ہیں‘‘۔