لندن، 15جنوری (یو این آئی) برطانوی خبر رساں ادارے نے دعویٰ کیا ہے کہ ایران پر امریکہ کے فوری حملے کا خطرہ بڑھ گیا ہے ، ، تمام اشارے ظاہر کرتے ہیں عنقریب حملہ ہوسکتا ہے ۔ رپورٹ کے مطابق برطانوی خبر ایجنسی نے مغربی فوجی حکام کے حوالے سے دعویٰ کیا ہے کہ اچانک حملہ امریکی فوج کی حکمت عملی کا حصہ ہوگا، ایران نے اپنی فضائی حدود تمام پروازوں کیلئے بند کردی ہے۔ برطانیہ نے عارضی طور پر تہران میں سفارتخانہ بند کردیا، مغربی ممالک نے اپنے شہریوں کو ایران سے فوری نکلنے کی ہدایت جاری کردی ہے ۔ دوسری جانب ایران نے خبردار کیا ہے کہ اگر امریکہ نے حملہ کیا تو وہ خطے میں موجود امریکی اڈوں کو نشانہ بنائے گا۔
ایران پر امریکی حملے کا خطرہ، ٹرمپ مختصر کارروائی کیلئے تیار
نیویارک۔15؍جنوری ( ایجنسیز )امریکہ کی درخواست پر اقوام متحدہ کی سلامتی کونسل کا اجلاس آج ہوگا۔پینٹاگون نے کروز میزائلوں، جنگی بحری جہازوں اور لڑاکا طیاروں سے لیس بحری بیڑہ ’یو ایس ایس ابراہم لنکن‘ مشرق وسطی ٰروانہ کردیا ہے۔امریکہ اور برطانوی میڈیا کے مطابق صدر ڈونالڈ ٹرمپ طویل جنگ کے بجائے مختصر لیکن فیصلہ کن کارروائی چاہتے ہیں۔غیرملکی میڈیا کے مطابق امریکی حملوں میں ایرانی پاسدارانِ انقلاب، بسیج فورس اور پولیس کو کروز میزائل سے نشانہ بنایا جاسکتا ہے۔ دوسری جانب ممکنہ حملے کے خطرے کے پیش نظر تہران میں برطانوی سفارتخانہ بند کردیا گیا، سفیر عملے سمیت روانہ ہوگئے۔ ہندوستان، اسپین، اٹلی اور پولینڈ نے بھی اپنے شہریوں کو ایران چھوڑنے کی ہدایت دی ہے۔ برطانیہ نے قطر کے امریکی فوجی اڈے سے بھی اپنا عملہ نکالنے کا فیصلہ کیا ہے۔