برسلز: یورپی یونین نے ایران کی جانب سے ‘فوردو’ نیوکلیئر پلانٹ پر یورینیم کی 20 فیصد سے زاید مقدار کی افزودگی کو ایٹمی معاہدہ کی سنگین خلاف ورزی قرار دیا ہے۔ یونین کا کہنا ہیکہ ایران کو جوہری ہتھیاروں کے حصول سے روکنا ناگزیر ہے۔یورپی یونین کے ترجمان پیٹر اسٹانو نے ‘العربیہ’ کو بتایا کہ ایران کو نیوکلیئر ہتھیار کے حصول سے روکنا ضروری ہے۔ انھوں نے بتایا کہ تہران کے یورینیم کی افزودگی بڑھانے کے فیصلے کے سنگین نتائج برآمد ہوئے ہیں۔ یہ اقدام ایٹمی معاہدے کی ایک بڑی خلاف ورزی ہے جو 2015 میں بڑے ممالک کے ساتھ طے پایا تھا۔انہوں نے یہ بھی کہا کہ ایران کو اپنی نیوکلیئر ذمہ داریوں کی پابندی کرنا ہوگی۔ یورپی یونین ‘آئی اے ای اے’ کی رپورٹ کا مطالعہ کرے گی تاکہ یہ یقینی بنایا جاسکے کہ تہران کیا کر رہا ہے۔انہوں نے مزید کہا کہ ہمیں امید ہے کہ نومنتخب امریکی صدر جو بائیڈن امریکہ کو ایران کے ساتھ جوہری معاہدے پر واپس لائیں گے بین الاقوامی جوہری توانائی ایجنسی نے اعلان کیا ہے کہ ایجنسی کا ڈائریکٹر جنرل آج رکن ممالک کو ایران میں ہونے والی حالیہ پیشرفت سے آگاہ کرے گا۔بیان میں کہا گیا ہے کہ ہمارے انسپکٹرز فوردو پلانٹ پر سرگرمیوں کی نگرانی کر رہے ہیں۔ ان کی معلومات کی بنیاد پر ایجنسی کے ڈائریکٹر جنرل رافیل ماریانو گروسی آج ایجنسی کے ممبر ممالک کو رپورٹ پیش کریں گے۔
