تہران ۔22 جنوری (سیاست ڈاٹ کام) ایرانی کی نوجوان خاتون اسپرنٹر فرازنہ فصیحی اولمپکس میں شرکت کیلئے پرامید ہیں۔ وہ کوٹے کے بجائے کارکردگی کے بل پر میگاایونٹ میں کوالیفائی کرنا چاہتی ہیں۔ فرزانہ نے 60 میٹرز کی دوڑ میں تیز ترین دوڑنے کا ملکی ریکارڈ بھی قائم کیا ہے۔ انہوں نے عالمی انڈور ایتھلیٹکس چمپئن شپ تک رسائی حاصل کرلی ہے۔ ایونٹ نانجنگ چین میں 13 سے 15 مارچ تک ہوگا۔ وہ چاہتی ہیں کہ خود کو عالمی سطح پر منوا کر ٹوکیو اولمپکس میں شرکت کا حق حاصل کرلیں۔ وہ2018 ایشین انڈور ایتھلیٹکس چمپئن شپ کے 60 میٹر ایونٹ میں برونز میڈل جیت چکی ہیں۔ فرزانہ نے سربین اسپرنٹ کلب میں شمولیت اختیار کی ہے جہاں انہیں بہتر تربیت کے مواقع ملیں گے اور کارکردگی میں نکھارلاکر اولمپکس 100 میٹر دوڑ میں شرکت کا خواب پورا کرسکتی ہیں۔
