تہران ۔3 اپریل ۔( سیاست ڈاٹ کام ) ایران کی پارلیمنٹ کے اسپیکر علی لاریجانی میں بھی کورونا وائرس ’’کووڈ۔19 ‘‘کی تشخیص ہوئی ہے ۔ ایران اسٹوڈنٹس نیوز ایجنسی نے یہ اطلاع دی ۔ ایجنسی کے مطابق لاریجانی کورونا وائرس کی جانچ میں مثبت پائے گئے ہیں جس کے بعد انہیں قرنطینہ میں منتقل کرتے ہوئے اُن کا علاج شروع کر دیا گیا ہے ۔ صحت اور طبی تعلیم کی وزارت کے اطلاعات عامہ اور انفارمیشن سینٹر کے سربراہ کنوش جھانپور نے بتایا کہ ملک میں گزشتہ 24 گھنٹوں کے دوران 124 افراد کی موت ہوئی ہے اور اس طرح ملک میں اب تک اس مہلک وائرس کی وجہ سے جاں بحق ہونے والوں کی تعداد 3160 ہو گئی ہے ۔ انہوں نے بتایا کہ اب تک ملک میں 16711 کورونا متاثرین صحت یا ب ہوئے ہیں، جبکہ 3956 افراد کی حالت نازک ہے ۔
