یہ کوئی اصلاح نہیں ‘ مسلط کیا گیا ظلم ہے‘کانگریس قائدکا ریمارک
نئی دہلی ۔23 نومبر ( ایجنسیز )لوک سبھا میں اپوزیشن قائد رراہول گاندھی نے ووٹر لسٹ کی خصوصی گہری نظر ثانی (ایس آئی آر) عمل کے خلاف ایک بار پھر بیان دیا ہے۔ انہوں نے الیکشن کمیشن کوتنقیدکا نشانہ بناتے ہوئے کہا کہ ایس آئی آر کے نام پر پورے ملک میں افراتفری مچی ہوئی ہے یہ کوئی اصلاح نہیں ہے بلکہ مسلط کیا گیا ظلم ہے۔راہول گاندھی نے ملک کی 12 ریاستوں اور مرکز کے زیر انتظام علاقوں میں جاری ایس آئی آر عمل کے متعلق ایکس پر ایک پوسٹ کیا ہے۔ انہوں نے لکھا کہ ایس آئی آر کے نام پر پورے ملک میں افراتفری مچا رکھی ہے نتیجہ؟ 3 ہفتوں میں 16 بی ایل او کی جان چلی گئی۔ ہارٹ اٹیک، تناؤ اور خودکشی، ایس آئی آر کوئی اصلاح نہیں بلکہ مسلط کیا گیا ظلم ہے۔انہوں نے مزید لکھا کہ ای سی آئی نے ایسا سسٹم بنایا ہے جس میں شہریوں کو خود کو تلاش کرنے کیلئے 22 سال پرانی ووٹر لسٹ کے ہزاروں صفحات پلٹنے پڑیں۔ مقصد صاف ہے، حقیقی ووٹرز تھک ہار جائے اور ووٹ چوری بغیر روک ٹوک کے جاری ہے۔ ہندوستان دنیا کیلئے جدید ترین سافٹ ویئر بناتا ہے لیکن الیکشن کمیشن آج بھی کاغذات کی ڈھیر اکٹھے کرنے پر بضد ہے۔ان کا یہ بھی کہنا ہے کہ اگر نیت صاف ہوتی تو فہرست ڈیجیٹل، تلاش کے قابل اور مشین کے ذریعہ پڑھنے کے قابل ہوتی اور ای سی آئی 30 دنوں کی مختصر وقت میں کام کرنے کے بجائے مناسب وقت دے کر جوابدہی پر توجہ مرکوز کرتا۔راہول کے مطابق ایس آئی آر ایک سوچی سمجھی چال ہے جہاں شہریوں کو ہراساں کیا جا رہا ہے اور بی ایل اوز کی غیر ضروری دباؤ سے ہونے والی اموات کو ضمنی نقصان سمجھ کر نظر انداز کر دیا گیا ہے۔
