پٹنہ : بہار کے دارالحکومت پٹنہ میں اٹل جینتی تقریب کے دوران مہاتما گاندھی کے پسندیدہ بھجن ’ایشور اللہ تیرو نام‘ کو لیکر تنازعہ ہو گیا۔ پٹنہ کے باپو آڈیٹوریم میں اٹل جینتی تقریب کا انعقاد کیا گیا تھا اور معروف بھوجپوری گلوکارہ دیوی نے اسٹیج سے مہاتما گاندھی کا پسندیدہ بھجن ’ایشور اللہ تیرو نام‘ گانا شروع کر دیا۔ جیسے ہی گلوکارہ نے ’ایشور اللہ تیرو نام‘ گایا تقریب میں موجود تمام لوگوں نے ہنگامہ کرنا شروع کر دیا۔ اس کے بعد گلوکارہ کو لوگوں کی شدید مخالفت کا سامنا کرنا پڑا معاملہ اتنا طول پکڑ گیا کہ گلوکارہ کو اسٹیج سے ہی معافی مانگنی پڑی۔ پروگرام میں سابق مرکزی وزیر اشونی چوبے بھی موجود تھے ۔ انہوں نے گلوکارہ کو اسٹیج سے اتارا اور اسٹیج سے ہی ’جے شری رام‘ کا نعرہ لگانے لگے۔ دیوی تقریب درمیان میں ہی چھوڑ کر چلی گئیں۔
