کراچی۔21 فروری (سیاست ڈاٹ کام ) کرکٹ ایشیا کپ کی تیسرے مقام پر منتقلی کے خدشات بڑھنے لگے جب کہ چیئرمین پی سی بی احسان مانی بھی اس حوالے سے اشارہ دے چکے ہیں۔کراچی میں میڈیا سے بات چیت کرتے ہوئے احسان مانی نے کہا کہ موجودہ صورتحال میں ہندوستانی ٹیم کے آنے کی کوئی امید نہیں، اگر ایشین کرکٹ کونسل پڑوسی ملک کے بغیر ہی ایونٹ کروانے کا فیصلہ کرلے تو الگ بات ہوگی لیکن اگر ہندوستان کو شرکت کرنا ہے تو مقام پاکستان کے بجائے کوئی اور ہوگا۔ ہمیں اس چیز کا بھی خیال رکھنا ہے کہ اسوسی ایٹ ٹیموں کی آمدنی متاثر نہ ہو،اس سے واضح ہے کہ تیسرے مقام کی ضرورت ہوگی۔ یاد رہے کہ بنگلہ دیشی ٹیم کی آمد کے وقت یہی کہا گیا تھا کہ معاہدہ کے تحت ایشیا کپ وہاں منتقل کردیا جائے گالیکن پی سی بی اس تاثرکو مسترد کر چکا ہے۔
