ریمارکس سے دستبرداری اختیار کرنے رام دیو کو مرکزی وزیر صحت ہرش وردھن کا مکتوب
نئی دہلی ۔ ملک کے معروف طبی ادارے انڈین میڈیکل ایسو سیشن یعنی آئی ایم اے نے یو گ گرو رام دیو کو ان کے ایلوپیتھی کیخلاف دئے گئے مبینہ بیان پر قانونی نوٹس بھیجا ہے۔ انہوں نے کہا ہے کہ ایک ویڈیو میں رام دیو مبینہ طور پر ایلوپیتھی کو غیر سائنسی پیتھی کے طور پر پیش کر کے اسے بدنام کر نے کی کوشش کر رہے ہیں۔واضح رہے رام دیو نے مبینہ طور پرکہا ہے کہ ایلوپیتھی ’بیوقوفی کی سائنس ‘ ہے اور ڈرگس کنٹرولر جنرل آف انڈیا یعنی ڈی سی جی آئی نے ریمڈیسیور ، فیو یفلو اور دیگر ادویات کو جو منظوری دی ہوئی ہے وہ کورونا کے علاج میں ناکام ثابت ہوئی ہیں۔ اس سے قبل رام دیو کے تعلق سے بیان آیا تھا جس میں انہوں نے مبینہ طور پر جدید طب پرعمل کرنے والوں کو ’قاتل‘ کہا تھا۔ آئی ایم اے کے ہمراہ ایمس کی ریزیڈنٹس ڈاکٹرس ایسوسیشن ،صفدر جنگ اسپتال کی ریزیڈنٹس ڈاکٹرس ایسوسیشن اور دیگر طبی اداروں نے مرکزی وزیر ہرش وردھن سے درخواست کی ہے کہ کووڈ کے علاج کے تعلق سے جو رام دیو عوام کو گمراہ کر رہے ہیں وہ ان کے خلاف سخت کارروائی کریں۔واضح رہے پتانجلی یوگ پیٹھ ٹرسٹ نے آئی ایم اے کے تمام الزامات کی تردید کی ہے کہ رام دیو لوگوں کو ایلوپیتھی کے تعلق سے گمراہ کر رہے ہیں۔بیان میں کہا گیا ہے کہ رام دیو کے دل میں ڈاکٹر اورطبی عملہ کے لئے بہت احترام ہے۔بیان میں کہا گیا ہے کہ وہ یعنی رام دیو صرف وہاٹس ایپ پر پیغامات کو پڑھ رہے تھے جو ان کو تقریب میں شریک ہوئے لوگوں سے صول ہوئے تھے اور رام دیو کے دل میں جدید سائنس کے بارے میں کوئی غلط بات میں نہیں ہے اور جو چیزیں ان سے جوڑ کر پیش کی جا رہی ہیں وہ غلط ہیں۔اس تعلق سیرام دیو کے خلاف طبی تنظیموں کا رویہ سخت ہوتا جا رہا ہے اور وہ تما مرکی وزیر صحت پر رام دیو کیخلاف سخت کارروائی کا مطالبہ کر رہی ہیں۔ رام دیو جن کو بی جیپی کا بہت قریبی سمجھا جاتا ہے اور جنہوں نے انتخابات میں بی جے پی کی کھل کر حمایت کی تھی ان کے خلاف سخت کارروائی کے امکان کم ہی نظر آتے ہیں۔مرکزی وزیر صحت ہرش وردھن نے اتوار کو رام دیو کو ایک مکتوب روانہ کرتے ہوئے ایلوپیتھی ریمارکس سے دستبرداری اختیار کرنے کو کہا۔ انہوں نے کہا کہ ہیلت کیئر ورکرس سخت جدوجہد اور محنت کے ساتھ کورونا کے خلاف لڑ رہے ہیں۔ ایسے میں ان کے ریمارکس سے ان کے جذبات کو ٹھیس پہنچی ہے۔ انڈین میڈیکل اسوسی ایشن نے وزیر صحت کی کارروائی پر ان سے اظہار تشکر کیا۔