سری نگر۔ 8 نومبر (یو این آئی) فوج کا کہنا ہے کہ شمالی کشمیر کے ضلع کپوارہ کے کیرن سیکٹر میں لائن آف کنٹرول (ایل او سی) پر انسداد در اندزی کے ایک آپریشن کے دوران 2 دہشت گردوں کو ہلاک کر دیا گیا جبکہ علاقہ میں آپریشن ہنوز جاری ہے ۔ فوج کی چنار کور نے ایکس پر ایک پوسٹ میں کہا کہ سیکوریٹی فورسز نے کپوارہ کے کیرن سیکٹر میں جاری آپریشن کے دوران دو دہشت گردوں کو ہلاک کر دیا۔ قبل ازیں انہوں نے کہا کہ 7نومبر 2025 کو ایجنسیوں کے مخصوص انٹیلی جنس ان پٹ کی بنیاد پر، دراندازی کی کوشش کے سلسلے میں، کپوارہ کے کیرن سیکٹر میں ایک مشترکہ آپریشن شروع کیا گیا۔ انہوں نے کہا کہ الرٹ جوانوں نے مشکوک سرگرمی دیکھ کر چیلنج کیا جس کے نتیجے میں دہشت گردوں نے اندھا دھند فائرنگ شروع کردی اور طرفین کے درمیان رابطہ قائم ہوا اور دہشت گرد پھنس گئے ۔ فوج کا کہنا ہے کہ علاقہ میں وسیع پیمانے پر تلاشی آپریشن جاری ہے ۔
