ابوظہبی : متحدہ عرب امارات دبئی میں القصیص پولیس اسٹیشن کے ڈائریکٹر کرنل سلطان عبداللہ العویس نے ایک لاکھ 10 ہزار درہم حوالے کرنے پر فرانس کے شہری کی ستائش کی ہے۔کرنل سلطان العویس نے کہا کہ ’فرانسیسی نوجوان نے ایک جگہ سے ملنے والے ایک لاکھ دس ہزار درہم پولیس کے حوالے کرکے ایمانداری کا مظاہرہ کیا‘۔انہوں نے کہا کہ’ دبئی پولیس کی جانب سے عزت افزائی ہمارے کردار،حکمت عملی اوراقدار کا اٹوٹ حصہ ہے۔ ہماری خواہش اور کوشش ہے کہ دبئی میں ایمانداری کو فروغ دیا جائے۔ اس سلسلے میں ملکی اور غیرملکی سب کے ساتھ یکساں سلوک کیا جائے۔ القصیص پولیس اسٹیشن کے ڈائریکٹر نے کہا کہ’ معاشرے کی اصلاح اور تعمیر و تشکیل کا کام پولیس کے ساتھ عوام کا بھی ہے۔ دونوں کے تعاون ہی سے معاشرہ صحت مند بنیادوں پر قائم رہ سکتا ہے‘۔
