مکہ مکرمہ ۔ 10 مئی (یو این آئی) سعودی عرب میں حج سکیورٹی فورس نے ہندوستانی شہری کو حج ضوابط کی خلاف وزری کے الزام میں حراست میں لے لیا ہے ۔ سعودی خبر رساں ادارے کی رپورٹ کے مطابق پرمٹ کے بغیر ایمبولینس میں چار رہائشیوں کو مکہ لے جانے کی کوشش پر ہندوستانی شہری کو گرفتار کیا گیا ہے ۔ حج سکیورٹی فورس کا اس حوالے سے کہنا ہے کہ یہ کیس قانون کی طرف سے مقررہ سزاؤں کے نفاذ کے لئے متعلقہ کمیٹی کے پاس بھیج دیا ہے ۔ واضح رہے کہ حج کے لیے پرمٹ کی شرط لازمی ہے جو بھی پرمٹ کے بغیر مکہ مکرمہ یا مشاعر مقدسہ میں داخل ہوگا یا وہاں قیام کرنے کی کوشش کرے گا وہ قوانین کی خلاف ورزی کا مرتکب ہو گا جس پر 20 ہزار ریال کا جرمانہ مقرر ہے ۔ رپورٹس کے مطابق مکہ مکرمہ کی حدود سے قبل تمام سمتوں سے آنے والی شاہراہوں پر چیک پوسٹیں حج سیزن کے آغاز سے ہی فعال کردی جاتی ہیں جہاں اہلکار 24 گھنٹے ڈیوٹی انجام دیتے ہیں، جو پرمٹ کے بغیر کسی کو مکہ مکرمہ جانے نہیں دیتے ۔ واضح رہے کہ رواں ہفتہ سعودی عرب میں حج سیکوریٹی فورسز نے ‘مکہ پرمٹ’ کے بغیر 22 افراد کو غیرقانونی طورپر مکہ لے جانے کی کوشش کرنے والے مصری شہری کو بھی حراست میں لے لیا تھا۔ وزارت داخلہ کی جانب سے مملکت کے مختلف شہروں میں مقیم غیرملکیوں کو سختی سے ہدایت کی تھی کہ کوئی بھی پرمٹ کے بغیرمکہ مکرمہ جانے کی کوشش نہ کرے ۔ سیکوریٹی فورسز کے مطابق گرفتار ملزم 22 افراد کو بس کے ذریعے مکہ مکرمہ لے جانے کی کوشش کررہا تھا۔ تمام افراد کے پاس حج پرمٹ نہیں تھا جس کی وجہ سے انہی بھی گرفتار کرلیا گیا ہے ۔ مرکزی ملزم کے خلاف مقدمہ درج کرکے اسے متعلقہ ادارے کے حوالے کردیا گیا ہے جہاں اس کے خلاف قانونی کارروائی کا آغاز کردیا گیا ہے ۔