حیدرآباد۔ سابق چیف منسٹر وائی ایس راج شیکھر ریڈی کی دختر وائی ایس شرمیلا کا 21 فبروری کو دورہ کھمم ملتوی کردیا گیا ہے ۔ کہا گیا ہے کہ ایم ایل سی گریجویٹ حلقہ کے انتخابات کے پیش نظر یہ دورہ ملتوی کیا گیا ہے ۔ وائی ایس شرمیلا نے 21 فبروری کو کھمم کا دورہ کرتے ہوئے ریاست کی سیاست میں قدم رکھنے کا اشارہ دیاتھا ۔ قبل ازیں کہا گیا تھا کہ وہ 21 فبروری کو صبح 8 بجے حیدرآباد میں لوٹس پانڈ سے اپنے دورہ کا آعاز کرینگی تاہم چونکہ ایم ایل سی انتخابات کا شیڈول جاری کردیا گیا اس لئے یہ دورہ ملتوی کردیا گیا ۔ شرمیلا کے کھمم دورہ کو 14 مارچ کو ہونے والے ایم ایل سی انتخابات کے بعد قطعیت دی جائے گی ۔ واضح رہے کہ شرمیلا کے دورہ کھمم پر تمام سیاسی جماعتوں کی توجہ مبذول ہوگئی تھی ۔ یہ ضلع شرمیلا کیلئے اہمیت کا حامل ہے کیونکہ 2014 انتخابات میں وائی ایس آر کانگریس کا ایک رکن پارلیمنٹ اور دو ارکان اسمبلی نے یہاں سے کامیابی حاصل کی تھی ۔
