کراچی۔ 15 ڈسمبر (سیاست ڈاٹ کام) عزیزآباد کے جناح گراؤنڈ میں نامعلوم شرپسندوں نے متحدہ قومی موومنٹ (ایم کیو ایم) سے وابستہ یادگار شہدا پر توڑ پھوڑ کردی۔مذکورہ واقعے کے بعد ایم کیو ایم کے تمام دھڑوں بشمول مصطفیٰ کمال کی زیر قیادت پاک سرزمین پارٹی کی طرف سے بھی سخت ردعمل کا اظہار کیا گیا۔انہوں نے توڑ پھوڑ کی مذمت کی اور اس میں ملوث عناصر کی فوری گرفتاری کا مطالبہ کیا۔تاہم ابھی یہ واضح نہیں ہوسکا کہ واقعہ کس وقت پیش آیا جبکہ یادگار شہدا کے اطرافی حصوں میں پولیس اور رینجرز ہمیشہ موجود رہتی ہے تاکہ ایم کیو ایم کے کسی دھڑے کی طرف سے کوئی اجتماع نہیں کیا جاسکے۔واضح رہے کہ ایم کیو ایم کا نائن زیرو ہیڈ کوارٹرپبلک سیکریٹریٹ ہے جو خورشید بیگم کمپلیکس سیمشہورہے اور عزیز آباد میں یادگار شہدا اس کے قریب واقع ہے۔سوشل میڈیا پر وائرل اور ٹی وی چینلز پر بھی نشر کی جانے والی ویڈیوز میں دیکھا جا سکتا ہے کہ یادگار شہدا کے اندر پھولوں کی چادر چڑھائے جانے والے پلیٹ فارم، سنگ مرمر کی دیواروں اور ماربل فرش کو توڑا گیا۔ایم کیو ایم پاکستان نے اس واقعے کی مذمت کرتے ہوئے اسے نامعلوم شرپسندوں کی جانب سے ناپاک حرکت قرار دی۔سینئر رہنما عامر خان اور فیصل سبزواری شہدا یادگار پر پہنچے اور شرپسند عناصر کے خلاف اظہار برہمی کیا جنہوں نے ‘ہزاروں شہدا کی یاد میں تعمیر کی گئی یادگار کو ناپاک کیا’۔انہوں نے یہ بھی اعلان کیا کہ یادگار شہدا کے تباہ شدہ حصوں کی تعمیر نو کی جائے گی۔
بعدازاں ایم کیو ایم پی کی رابطہ کمیٹی نے ایک ہنگامی اجلاس طلب کیا تاکہ مستقبل کے لائحہ عمل کو آگے بڑھایا جا سکے۔دوسری جانب پی ایس پی کے چیئرمین مصطفیٰ کمال نے ایک بیان میں کہا کہ بانیان پاکستان کے بچے یادگار شہدا سے جذباتی طور پر منسلک ہیں۔