حیدرآباد ۔26 ستمبر (سیاست ڈاٹ کام ) حیدرآباد کرکٹ اسو سی ایشن (ایچ سی اے )کے انتخابات میں صدر کے عہدہ کیلئے ہندوستانی ٹیم کے سابق کپتان اظہرالدین کی کامیابی کی حیدرآبادی عوام کو امید ہے اور انتخابات سے قبل ہی اظہرالدین کی کامیابی اور صورت حال کے متعلق عوامی حلقوں میں تبادل خیالات ہورہے ہیں۔ اظہر الدین کے ساتھ ایچ سی اے کے صدر کے عہدے کے لئے 2 اور امیدوار میدان میں ہیں۔ سمجھا جا رہا ہے کہ کرکٹ کے کھیل کی سمجھ بوجھ اور بین الاقوامی کرکٹ کا وسیع تجربہ اظہرالدین کوآسانی سے کامیاب ہونے میں مدد دیگا۔ 2017میں منعقدہ حیدرآباد کرکٹ اسوسی ایشن کے انتخابات میں صدر کے عہدہ کیلئے سابق کپتان اظہرالدین مقابلہ کرنے کی کوشش کی تھی لیکن انکا پرچہ نامزدگی اسلئے قبول نہیں کیا گیا تھا کہ وہ ان پر لگائے گئے میچ فکسنگ کے الزامات کے بعد عائد پابندی ہٹائے جانے کا بی سی سی آئی کی جانب سے جاری ثبوت پیش کرنے میں ناکام رہے تھے لیکن اس سال حیدرآباد کرکٹ اسوسی ایشن کے لئے انتخابات میں حصہ لینے کے لئے انہیں ایسی کوئی مشکل درپیش نہیں ہے اس مرتبہ صدر کے عہدہ کیلئے انکا پرچہ نامزدگی قبول کر لیا گیا ہے ایچ سی اے کے صدر کے عہدہ کے لئے اظہرالدین کے ساتھ 2 امیدوار پرکاش چند جین اورکے دلیپ کمار بھی میدان میں ہیں لیکن بحیثیت کرکٹراظہرالدین کے مقام اور انکے تجربہ کو دیکھتے ہوئے یہ سمجھاجارہا کہ اظہر الدین بہ آسانی یہ انتخابات جیت جائیں گے۔ حیدرآباد کرکٹ اسو سی ایشن میں شامل کلبس اور اراکین اظہر الدین کے الیکشن میں حصہ لینے کے فیصلہ سے جس طرح پرجوش ہیں اظہرالدین کو اعتماد ہے کہ انہیں صدر کا عہدہ آسانی سے حاصل ہو جائے گا اظہرالدین نے وعدہ کیا ہے کہ ایچ سی اے کی صدارت حاصل کرنے کے بعد وہ حیدرآباد کرکٹ کو ترقی کی سمت لے جائیں گے حیدرآباد کرکٹ اسو سی ایشن کے5 عہدوں کیلئے رائے دہی 27 ستمبرکومقرر ہے۔
