نئی دہلی ۔22؍مئی (ایجنسیز ) سپریم کورٹ نے شراب کی دکان کے لائسنس کی اجرائی سے متعلق مبینہ بدعنوانی کے معاملہ میں ٹاملناڈو اسٹیٹ مارکیٹنگ کارپوریشن کے خلاف منی لانڈرنگ کی جانچ پر جمعرات کو روک لگاتے ہوئے کہا کہ انفورسمنٹ ڈائرکٹوریٹ (ای ڈی) دستور کی خلاف ورزی کرتے ہوئے تمام حدیں پار کر رہا ہے۔ چیف جسٹس بی آر گوئی اور جسٹس آگسٹین جارج مسیح کی بنچ نے مدراس ہائی کورٹ کے حکم پر روک لگا دی جس میں ای ڈی کو 1000 کروڑ روپے کے مبینہ اسکام کی جانچ کی اجازت دی گئی تھی۔بنچ نے مرکزی ایجنسی کی طرف سے پیش ہونے والے ایڈیشنل سالیسٹر جنرل ایس وی راجو سے کہاکہ آپ کی ای ڈی تمام حدیں پار کر رہی ہے۔ آپ کا دفتر کسی کارپوریشن پر کیسے چھاپہ مار سکتا ہے؟ آپ ملک کے وفاقی ڈھانچہ کی مکمل خلاف ورزی کر رہے ہیں۔سپریم کورٹ نے ای ڈی کو نوٹس جاری کیا اور کہا کہ وہ اس معاملہ کی اگلی سماعت گرمیوں کی چھٹیوں کے بعد کرے گی۔ حکومت ِ ٹاملناڈو نے سرکاری شراب خوردہ فروش ٹاملناڈو اسٹیٹ مارکیٹنگ کارپوریشن کے احاطہ میں اپنی تحقیقات کے دوران ای ڈی کے ذریعہ کئے گئے چھاپوں کی صداقت کو چیلنج کیا تھا۔مدراس ہائی کورٹ نے 23 اپریل 2025 کو ریاستی حکومت کی عرضی کو خارج کر دیا تھا اور ای ڈی کی کارروائی کو ہری جھنڈی دے دی تھی۔ ہائی کورٹ نے ای ڈی کو منی لانڈرنگ کی روک تھام ایکٹ (پی ایم ایل اے) کے تحت کارروائی جاری رکھنے کی اجازت دی تھی۔
