ممبئی: انفورسمنٹ ڈائریکٹوریٹ (ای ڈی) نے منی لانڈرنگ کی تحقیقات کے ایک حصے کے طور پر مہاراشٹر کے تھانے میں 55 لاکھ روپے مالیت کا ایک فلیٹ اپنے قبضے میں لے لیا ہے، جو مفرور گینگسٹر داؤد ابراہیم کے بھائی اقبال کاسکر کے مبینہ ساتھی کے نام پر ہے۔ ای ڈی ذرائع نے منگل کو بتایا کہ تھانے ویسٹ میں نیوپولس کی عمارت میں واقع رہائشی یونٹ کو پی ایم ایل اے کے تحت 2022 میں اس کے مالک ممتاز اعجاز شیخ کے خلاف جاری کردہ ایک عارضی حکم کے تحت منسلک کیا گیا ہے۔ منی لانڈرنگ کی روک تھام ایکٹ (PMLA) ٹربیونل نے اس عارضی اٹیچمنٹ آرڈر کی منظوری دے دی تھی، جس سے ED کے لیے اس پر قبضہ کرنے کی راہ ہموار ہوئی تھی۔ ذرائع نے بتایا کہ فلیٹ پر قبضہ کرنے کا عمل حال ہی میں مکمل ہوا ہے۔ ای ڈی نے اس سے قبل ایک بیان میں الزام لگایا تھا کہ فلیٹ کو کاسکر اور دیگر نے تھانے کے رئیل اسٹیٹ ڈیولپر سریش دیوی چند مہتا سے زبردستی اپنے قبضہ میں لے لیا تھا۔
