نئی دہلی، 20 نومبر (یو این آئی) انفورسمنٹ ڈائریکٹوریٹ (ای ڈی) کے نام پر دھوکہ دہی اور جبراً وصولی کے لیے جعلی سمن بھیجے جانے کی بڑھتی خبروں کے درمیان ای ڈی نے شہریوں کو سمن نوٹس کی اصل حقیقت کی تصدیق میں مدد کرنے کیلئے نئے طریقے نافذ کیے ہیں۔ وزارت خزانہ نے آج اپنے سرکاری اکاؤنٹ کے ذریعے اس کا اعلان کیا۔فرضی ای ڈی سمن اصل نوٹس سے ملتے جلتے ہوتے ہیں، جس سے وصول کنندگان کے لیے اصلی اور فرضی میں فرق کرنا مشکل ہو جاتا ہے ۔ اس کے حل کے لیے ای ڈی اب سسٹم سے بننے والے سمن جاری کر رہا ہے ، جس میں ایک کیو آر کوڈ اور ایک منفرد پاس کوڈ ہوتا ہے ۔وزارت خزانہ نے کہا کہ انفورسمنٹ ڈائریکٹوریٹ کے ذریعہ جاری کردہ سمن کو اس پر چھپے کیو آر کوڈ کو اسکین کرکے یا سرکاری ای ڈی ویب سائٹ پر جا کر تصدیق کیا جا سکتا ہے ۔ ای ڈی نے یہ بھی واضح کیا کہ وہ ڈیجیٹل یا آن لائن گرفتاری نہیں کرتا۔ ای ڈی نے شہریوں کو جعلی لوگوں سے ہوشیار رہنے کا مشورہ دیا ہے ۔ ای ڈی نے شہریوں سے اپیل کی ہے کہ وہ کوئی بھی قدم اٹھانے سے پہلے محتاط رہیں۔