نئی دہلی، 17 دسمبر (یو این آئی) انفورسمنٹ ڈائریکٹوریٹ (ای ڈی) کے امپھال سب زون نے منی لانڈرنگ کی روک تھام کے قانون (پی ایم ایل اے ) کے تحت سلائی گروپ آف کمپنیز سے وابستہ اہم افراد کے خلاف درج معاملے میں امپھال کے پانچ مقامات پر تلاشی مہم شروع کی ہے ۔ ای ڈی کے مطابق یہ معاملہ سال 2019 میں لندن میں منعقدہ ایک پریس کانفرنس سے جڑا ہے ، جہاں یامبیم بیرن، جنہوں نے خود کو ‘منی پور اسٹیٹ کونسل کا وزیر اعلیٰ’ بتایا اور نارنگ بام سمرجیت، جنہوں نے خود کو ‘منی پور اسٹیٹ کونسل کا وزیر خارجہ و دفاع’ بتایا تھا۔ انہوں نے ہندوستان سے منی پور کی آزادی کا دعویٰ کیا تھا۔ ان ملک مخالف سرگرمیوں کے ذریعے ملزمان پرملک کے خلاف جنگ چھیڑنے ، بغاوت (غداری) اور مختلف گروپوں کے درمیان عداوت، دشمنی اور نفرت پھیلانے جیسے جرائم میں ملوث ہونے کا الزام ہے ۔ قومی تحقیقاتی ایجنسی (این آئی اے ) اور مرکزی تفتیشی بیورو (سی بی آئی) پہلے ہی ملزمان کے خلاف معاملات درج کر چکی ہیں۔