مبئی: شیو سینا کے لیڈر سنجے راوت نے ایک مرتبہ پھر مرکز کی مودی حکومت پر حملہ بولتے ہوئے مرکزی ایجنسیوں کے غلط استعمال کا الزام عائد کیا۔ سنجے راوت نے کہا کہ ای ڈی کو 48 گھنٹے کے لئے ہمارے ہاتھ میں دے کر دیکھئے، دیویندر فڈنویس بھی شیو سینا کے حق میں ووٹ کریں گے۔سنجے راوت اکثر ای ڈی کے غلط استعمال کا الزام عائد کرتے ہوئے مرکزی حکومت پرطنز کرتے رہتے ہیں۔سنجے راوت کہتے ہیں کہ شیوسینا ای ڈی سے خوف نہیں کھاتی۔ قبل ازیں، سنجے راوت نے اپنے بیان میں کہا تھاکہ پورے ملک میں مرکزی تفتیشی ایجنسی کی ٹائمنگ ہمیں معلوم ہے۔ جہاں کہیں بھی الیکشن ہونے والا ہوتا ہے یا جب کسی ریاستی حکومت کو غیر مستحکم کرنا ہوتا ہے تو ای ڈی اور سی بی آئی کو بھیجا جاتا ہے لیکن نہ مہاراشٹر جھکے گا اور نہ ہی شیو سینا ڈرے گی۔خیال رہے کہ مہاراشٹر میں راجیہ سبھا کی چھ میں سے تین سیٹیں بی جے پی کے جیتنے کے بعد شیو سینا لیڈر سنجے راوت نے جمعہ کے روز الیکشن کمیشن پر بی جے پی کی حمایت کرنے کا الزام عائد کیا تھا۔ سنجے راوت نے کہا کہ الیکشن کمیشن نے ہمارے ایک ووٹ کو منسوخ کر دیا۔ ہم نے دو ووٹوں پر اعتراض کیا تھا لیکن اس پر کارروائی نہیں کی گئی۔ الیکشن کمیشن نے بی جے پی کی حمایت کی۔مہاراشٹر میں بی جے پی کے پیوش گوئل، انیل بونڈے اور دھننجے مہادک نے راجیہ سبھا انتخابات میں جیت حاصل کی۔
