حیدرآباد28اپریل (سیاست ڈاٹ کام ) اے پی میں کورونا وائرس کے 82نئے مثبت معاملات درج ہوئے ہیں۔اس تلگوریاست میں روز بروز اس وبا کے مریضوں کی تعداد میں اضافہ ہوتاجارہا ہے ۔محکمہ صحت کی جانب سے منگل کو نئے معاملات کے سلسلہ میں بلیٹن جاری کیاگیا ہے ۔نئے معاملات کے ساتھ ہی کورونا وائرس کے مریضوں کی ریاست میں تعداد بڑھ کر1259تک جاپہنچی۔گذشتہ 24گھنٹوں کے دوران یہ نئے معاملات سامنے آئے ہیں۔سب سے زیادہ معاملات گذشتہ 24گھنٹوں کے دوران ضلع کرنول میں درج کئے گئے ہیں۔اس ضلع میں گذشتہ 24گھنٹوں کے دوران 40افراد اس وبا سے متاثر ہوئے ہیں۔دوسرے نمبر پر ضلع گنٹورہے جہاں 17معاملات کورونا وائرس کے درج کئے گئے ہیں۔تیسرے نمبر پر ضلع کرشنارہا ہے ۔اس ضلع میں 13نئے معاملات درج کئے گئے ہیں۔اضلاع وجیانگرم،وشاکھاپٹنم،سریکاکلم،مغربی گوداوری،مشرقی گوداوری اور پرکاشم میں گذشتہ 24گھنٹوں کے دوران کوئی بھی نیامعاملہ درج نہیں ہوا ہے جبکہ بہ حیثیت مجموعی 332معاملات کے ساتھ سب سے آگے ضلع کرنول ہے ۔دوسرے نمبر پر ضلع کرشناہے جہاں 223معاملات درج کئے گئے ہیں۔ اب تک258افراد روبہ صحت ہوگئے ہیں جن کو گھرجانے کی اجازت دے دی گئی ہے ۔سب سے زیادہ روبہ صحت ہونے والے افراد ضلع کرنول کے ہیں جہاں اب تک 43افراد کو گھر جانے کی اجازت دی گئی ہے ۔ ریاست میں اس موذی مرض سے مزید چارافراد کی موت ہوئی ہے ۔اس طرح اس وبا سے مرنے والوں کی تعداد 31تک جاپہنچی ہے ۔