حیدرآباد4 فروری( سیاست نیوز ) مرکزی حکومت نے واضح کردیا ہے کہ کسی بھی ریاست کے دارالحکومت کے معاملہ میں مرکز کا کوئی رول نہیں ہے اور دارالحکومت کا مسئلہ ریاستی حکومت کا فیصلہ ہے ۔اے پی میں دارالحکومت امراوتی کی منتقلی اور تین دارالحکومتوں کے قیام کے ریاستی حکومت کے قدم پر ریاست کی اصل اپوزیشن تلگودیشم کے رکن جی جئے دیو کی جانب سے پوچھے گئے سوال کا تحریری جواب ایوان میں دیتے ہوئے مرکزی مملکتی وزیرداخلہ نتیانند رائے نے کہاکہ ریاستی حکومت کو اپنی مرضی کے مطابق دارالحکومت مقرر کرنے کا اختیار حاصل ہے اور اس سے مرکز کا کوئی تعلق نہیں ہے ۔واضح رہے کہ اے پی حکومت نے موجودہ دارالحکومت امراوتی کے بجائے تین دارالحکومتوں کے قیام کے ذریعہ ترقی کو غیر مرکوز کرنے کا قدم اٹھایا ہے جس کی امراوتی کے کسانوں کی جانب سے شدید مخالفت کی جارہی ہے اور اس مسئلہ پر احتجاج بھی بڑے پیمانہ پر کئے گئے ہیں۔کسانوں کے ساتھ ساتھ تلگودیشم پارٹی بھی اس قدم کی مخالفت کررہی ہے اور اس کے لیڈروں نے بھی اس مسئلہ پر احتجاج کیا ہے ۔تلگودیشم کے رکن پارلیمنٹ جی جئے دیو نے اس مسئلہ کو لوک سبھامیں اٹھایا تاہم مرکز نے واضح کردیا کہ وہ ریاست کے امور میں مداخلت نہیں کرے گا۔
