نیویارک : سابق امریکی صدر ڈونالڈ ٹرمپ کی جانب سے امریکی صدر بائیڈن کے اسٹیٹ آف دی یونین خطاب کو شدید تنقید کا نشانہ بنایا گیا۔ سابق امریکی صدر ڈونالڈ ٹرمپ نے صدر بائیڈن کے خطاب کو بدترین اور باعث شرمندگی قرار دیتے ہوئے کہا کہ صدر بائیڈن نے غصے اور نفرت سے بھری تقریر کی۔ ڈونالڈ ٹرمپ کا کہنا تھا کہ بائیڈن امیگریشن بحران کوحل نہیں کرنا چاہتے، بائیڈن انتظامیہ ملک کو تارکین وطن سے بھرنا چاہتی ہے، انہوں نے کہا کہ پیوٹن نے یوکرین پرحملہ بائیڈن کی وجہ سے کیا۔ واضح رہے کہ امریکہ کی سپریم کورٹ نے ملک کے سابق ڈونالڈ ٹرمپ کو صدارتی انتخابات میں حصہ لینے کیلئے اہل قرار دیدیا ہے۔ پیر کے روز متفقہ طور پر امریکی سپریم کورٹ نے اپنا فیصلہ سناتے ہوئے کہا کہ ڈونالڈ ٹرمپ امریکی صدارتی انتخابات کے لیے اہل ہیں۔ اب کوئی دوسری ریاست ٹرمپ کو آئین میں بغاوت کی شق کا استعمال کرتے ہوئے صدارتی ووٹنگ سے نہیں روک سکتی۔ امریکی عدالت کا اپنے فیصلہ میں مزید کہنا تھا کہ ریاستوں کی سپریم کورٹ فیصلہ نہیں کرسکتیں کہ کوئی صدارتی امیدوار نااہل ہے۔ سپریم کورٹ نے پیر کے روز متفقہ طور پر کولوراڈو کی عدالت کے فیصلہ کو کالعدم قرار دیا، جس میں ڈونالڈ ٹرمپ کو ری پبلکن صدارتی امیدوار کی حیثیت سے حصہ لینے سے روک دیا گیا تھا۔
