وزیراعظم ہند نریندر مودی بھی دیگر مہمان سربراہان میں شامل
واشنگٹن : امریکہ کے صدر جو بائیڈن آئندہ ہفتے ’کواڈ گروپ‘ میں شامل ملکوں کے سربراہان کے اجلاس کی صدارت کریں گے۔ اجلاس کا مقصد چین کے بڑھتے ہوئے اثر و رسوخ کے پیشِ نظر ایک دوسرے کے درمیان تعاون کو بڑھانا ہے۔وائٹ ہاؤس کی پریس سکریٹری جین ساکی نے ایک بیان میں کہا ہے کہ بھارت، آسٹریلیا، جاپان اور امریکہ کے رہنماؤں کا اجلاس 24 ستمبر کو وائٹ ہاؤس میں ہو گا۔انہوں نے کہا کہ 21 ویں صدی کے چیلنجز کو سامنے رکھتے ہوئے ہند بحرالکاہل میں رابطے بڑھانا بائیڈن انتظامیہ کی ترجیح ہے۔جین ساکی نے کہا کہ کواڈ رہنماؤں کی توجہ تعلقات کی مضبوطی اور کورونا وائرس کے خلاف جنگ کے لیے عملی کوششوں سمیت ماحولیاتی تبدیلی، ٹیکنالوجی اور سائبر اسپیس کے چیلنجز سے نمٹنا ہے۔وائٹ ہاؤس کی ترجمان نے کہا کہ ہند بحرالکاہل خطے کو آزاد اور کھلا رکھنے کے معاملے پر بھی رہنما گفتگو کریں گے۔تجزیہ کاروں کے مطابق بھارت، امریکہ، آسٹریلیا اور جاپان پر مشتمل چار ملکوں پر مشتمل ‘کواڈ گروپ’ کے قیام کا مقصد بحر الکاہل خطے میں چین کی سرگرمیوں پر نظر رکھنا ہے۔ آسٹریلوی وزیرِ اعظم اسکاٹ موریسن، ہندوستانی وزیرِ اعظم نریندر مودی اور جاپان کے وزیر اعظم یوشی ہائید اقوامِ متحدہ کی جنرل اسمبلی کے اجلاس میں شرکت کریں گے اور صدر بائیڈن جنرل اسمبلی سے 21 ستمبر کو خطاب کریں گے۔
عرب دنیا میں مصر اسرائیل کے ساتھ سفارتی تعلقات قائم کرنے والے اولین ممالک میں سے ایک ہے۔ حماس اور اسرائیل کی کشیدگی میں زیادہ تر مصر ہی ایک ثالث کا کردار ادا کرتا آیا ہے۔