واشنگٹن۔ امریکی صدر ٹرمپ نے ممکنہ ڈیمو کریٹ صدارتی امیدوار جو بائیڈن پر سوشلسٹ ہونے کا الزام لگایا ہے اور سینیٹر برنی سینڈرز کا کٹھ پتلی قرار دے دیا۔ٹرمپ نے کہا کہ بائیڈن کے امریکہ میں کوئی محفوظ نہیں ہوگا۔دوسری جانب امریکی صدر نے اپنے دیرینہ ساتھی اور سابق مشیر راجر اسٹون کی 40 ماہ قید کی سزا ختم کر دی ہے ۔ وائٹ ہاؤس نے کہا ہے کہ راجر اسٹون اب آزاد شخص ہیں۔ٹرمپ کی جانب سے یہ اعلان راجر اسٹون کی سزا شروع ہونے سے چند روز قبل سامنے آیا ہے ۔ اسٹون کو 2016 کے امریکی انتخابات میں روس کی مبینہ مداخلت کی تحقیقات میں کانگریس کے سامنے جھوٹا بیان دینے پر سزا سنائی گئی تھی۔ایک سروے کے مطابق مارچ تا جون تک ٹرمپ کے مقابلے میں جو بائیڈن کی مقبولیت میں 12 پوائنٹس کا اضافہ ہوا ہے ۔
روس: گورنر کی گرفتاری پر مظاہرے
ماسکو ۔ روسی شہر خابرووسکی میں مقامی گورنر کو حراست میں لیے جانے کے خلاف ہزاروں افراد نے مارچ کیا۔ سیرگئی فْرگل پر الزام ہے کہ انہوں نے پندرہ برس قبل کئی مقامی کاروباری شخصیات کے قتل کا منصوبہ بنایا تھا۔ جمعرات کو فرگل کو گرفتار کر کے ماسکو منتقل کیا گیا تھا۔ یہ بات اہم ہے کہ 2018 ء میں فرگل کی لبرل ڈیموکریٹک پارٹی نے صدر پوٹن کی حمایت یافتہ یونائیڈ رشیا پارٹی کو شکست دی تھی۔ بتایا جا رہا ہے کہ اگر فرگل پر عائد الزامات ثابت ہوتے ہیں تو انہیں عمر قید کی سزا ہو سکتی ہے۔