حیدرآباد، 18ستمبر (یو این آئی) سکندرآباد میں خطرناک آتشزدگی واقعہ کے سلسلہ میں کلوز ٹیم نے رپورٹ پیش کردی ہے ۔اس واقعہ میں 8افراد کی موت ہوگئی تھی۔اس ابتدائی رپورٹ میں کلوز ٹیم نے نشاندہی کرتے ہوئے واضح کیا کہ بیٹری کے پھٹ پڑنے اوراس سے نکلنے والا دھواں اس واقعہ کی اہم وجہ ہے ۔ایک ٹو وہیلر کی چارجنگ پر لگائی گئی بیٹری کے اوور چارج ہونے پراس سے چنگاریاں نکلنے لگیں،بڑے پیمانہ پر دھواں پھیل گیااور دیکھتے ہی دیکھتے آگ پھیل گئی۔اس آگ نے وہاں رکھی گاڑیوں کو بھی اپنی لپیٹ میں لے لیا۔اس رپورٹ میں کہاگیا کہ جلد ہی یہ آگ عمارت کے سیلار سے اس کی دوسری منزلوں پر پھیلتی چلی گئی۔بیٹری میں موجود لیتھیم کی وجہ سے آگ اور دھواں تیزی کے ساتھ پھیل گیا ۔ متاثرین کو اسپتال میں داخل کروایاگیا تھا تاہم تمام کو گھر جانے کی اجازت دے دی گئی۔اس واقعہ سے علاقہ میں سنسنی پھیل گئی تھی۔ گراونڈ فلورپرالکٹرک بائیکس کا شوروم ہے اور چوتھی منزل سے لاج ہے ۔ آگ سے لاج میں مقیم افراد پھنس گئے تھے کیونکہ پوری عمارت میں دھواں پھیل گیا تھا۔ آگ اس قدرزیادہ تھی کہ لوگ جان بچانے پائپس سے نیچے اترنے لگے تھے ۔
