پٹنہ: بائیں بازو کی پارٹی نے مرکزی وزیر داخلہ امیتشاہ کے استعفیٰ کا مطالبہ کرتے ہوئے 30 دسمبر کو ملک گیر یوم احتجاج منانے کا فیصلہ کیا ہے ۔ جمعہ کو بائیں بازو کی جماعتوں کی طرف سے جاری پریس ریلیز میں کہا گیا ہے کہ راجیہ سبھا میں مسٹر شاہ کے ڈاکٹر بی آر۔ امبیڈکر پر کیے گئے توہین آمیز تبصروں کے خلاف پورے ملک میں بڑے پیمانے پر غصہ پایا جاتا ہے ۔ مختلف جگہوں پر احتجاج ہو رہا ہے ، لیکن نہ ہی امیت شاہ اور نہ ہی وزیر اعظم نریندر مودی کوئی ذمہ داری لینے اور تدارک کی کارروائی کرنے کو تیار ہیں۔ اس لیے بائیں بازو کی جماعتوں نے مسٹر شاہ کے استعفیٰ کا مطالبہ کرتے ہوئے 30 دسمبر کو ملک گیر احتجاجی مظاہرہ کرنے کا فیصلہ کیا ہے ۔ سی پی آئی (ایم ایل) کے ریاستی سکریٹری کنال، کمیونسٹ پارٹی آف انڈیا (سی پی آئی) کے ریاستی سکریٹری رام نریش پانڈے ، کمیونسٹ پارٹی آف انڈیا (مارکسسٹ) کے ریاستی سکریٹری لالن چودھری اور آل انڈیا فارورڈ بلاک (اے آئی ایف بی) اور انقلابی سوشلسٹ پارٹی (آر ایس پی) کے قائدین نے جمعہ کو ایک مشترکہ پریس بیان جاری کرتے ہوئے 30 دسمبر کو ریاست کے تمام ضلعی ہیڈکوارٹرز پر مشترکہ طور پر یوم احتجاج منانے کا اعلان کیا ہے ۔ بائیں بازو کے رہنماؤں نے کہا کہ امیت شاہ کے ریمارکس بھارتیہ جنتا پارٹی (بی جے پی) اور راشٹریہ سویم سیوک سنگھ (آر ایس ایس) کی آئین اور بابا صاحب کے تئیں نفرت کا مظاہرہ ہیں۔ منو اسمرتی کو ملک کا آئین بنانے کی ان کی مایوسی صاف نظر آرہی ہے ، لیکن ملک کے عوام آئین اور بابا صاحب پر ہونے والے ہر حملے کے خلاف سخت احتجاج کرتے رہیں گے ۔
